पौष २३ बझाङ । महिलालाई आत्मनिर्भर र उद्यमशील बनाउने उद्देश्यले बझाङको जयपृथ्वी नगरपालिकाले ७ दिने अचार बनाउने तालिम दिएको छ । महिलालाई आत्मनिर्भर र उद्यमशील बनाउने उद्देश्यले बझाङको जयपृथ्वी नगरपालिकाले ७ दिने अचार बनाउने तालिम दिएको हो ।
नगरपालिकाको महिला विकास शाखाको आयोजनामा सञ्चालन गरिएको उक्त तालिममा वडा नम्बर १ देखि ११ सम्मका महिलाहरूको उल्लेखनीय सहभागिता रहेको थियो । तालिम कमार्फत महिलाहरूलाई विभिन्न किसिमका अचार बनाउने व्यावहारिक सीप प्रदान गरिएको महिला विकास शाखा अध्यक्ष रमा जोशीले जानकारी गराईन ।
अध्यक्ष जोशीले तालिमको मुख्य उद्देश्य महिलाहरूलाई स्वरोजगार तथा आय आर्जनसँग जोड्दै आर्थिक रूपमा सशक्त बनाउनु भएको बताईन । महिलाले घरमै बसेर पनि उद्यम गर्न सक्ने सीप सिकुन् भन्ने लक्ष्यकासाथ तालीम दिइएको उनले बताईन ।
तालिम अवधिभर सहभागी महिलाहरूलाई स्थानीय स्रोतसाधनको प्रयोग गरी गुणस्तरीय अचार उत्पादन, प्याकेजिङ, भण्डारण तथा बजार व्यवस्थापनका बारेमा समेत जानकारी दिइएको उनले बताईन । तालिमबाट प्राप्त सीपले महिलाहरूलाई भविष्यमा साना उद्यम सञ्चालन गर्न सहयोग पुग्ने अपेक्षा गरिएको छ ।
बुधबार सम्पन्न भएको तालिमका सहभागी महिलाहरूले यस्ता सीपमूलक तालिमले आफूहरूलाई आत्मविश्वासी बनाएको र आगामी दिनमा व्यवसायिक रूपमा अघि बढ्न प्रेरणा मिलेको प्रतिक्रिया दिएका छन् ।जयपृथ्वी नगरपालिकाले आगामी दिनमा पनि महिलामैत्री तथा उद्यमशीलता प्रवद्र्धन गर्ने यस्ता कार्यक्रमलाई निरन्तरता दिने जनाएको छ ।
समापन कार्यक्रममा जयपृथ्वी नगरपालिकाका नगरप्रमुख चेतराज बजाल, उप–प्रमुख रतन बहादुर सिंह, प्रमुख प्रशासकीय अधिकृत लगायत नगरपालिकाका अन्य पदाधिकारी तथा सरोकारवालाहरूको उपस्थिति रहेको थियो । कार्यक्रममा बोल्ने वक्ताहरूले महिलालाई सीप र उद्यमसँग जोड्ने यस्ता कार्यक्रमले स्थानीय अर्थतन्त्र सुदृढ बनाउन महत्वपूर्ण भूमिका खेल्ने विश्वास व्यक्त गर्दै आगामी दिनमा पनि यस्ता तालिमलाई निरन्तरता दिने प्रतिबद्धता जनाएका थिए ।
