पौष २३ धनगढी । घोडाघोडी सिमसार क्षेत्रमा हरिहाँसको सङ्ख्या बढेको पाईएको छ भने जलपन्छीको संख्या घटेको पाईएको छ । चरा संरक्षण नेटवर्क कैलालीको टोलीले यही पुस १९ गते देखि २१ गतेसम्म गणना गर्दा नेपालको पहिलो चरा अभय आरण्य हरिहाँसको सङ्ख्या बढेको पाईएको हो भने जलपन्छीको संख्या घटेको पाईएको हो ।
घोडाघोडीको सूचक प्रजाति हरिहाँसको सङ्ख्या बढेको चरा संरक्षण नेटवर्कका सचिव रामकुमार चौधरीले जानकारी गराए । सन् २०२२ मा हरिहाँस ३ सय ९४ रहेकोमा सन् २०२३ मा ३ सय १६, सन् २०२४ मा ४ सय ११, सन् २०२५ मा ३ सय ७२ र यस वर्ष ४ सय २९ पुगेको चौधरीले जानकारी गराए ।
त्यसैगरी जलपन्छीको सङ्ख्या घटेको बताउदै चरा संरक्षण नेटवर्कका अध्यक्ष चौधरीले सन् २०२२ मा १ हजार ६ सय ८५ रहेको जलपन्छी सन् २०२३ मा १ हजार २ सय २१, सन् २०२४ मा १ हजार ४ सय ३७, सन् २०२५ मा १ हजार ३ सय १६ र यस वर्ष १ हजार १ सय ६८ मा सीमित भएको जानकारी गराए ।
अध्यक्ष चौधरीले कैलाली जिल्लामा सबैभन्दा धेरै तालतलैया रहेको बताउदै घोडाघोडी ताल तराई क्षेत्रको सबैभन्दा ठूलो प्राकृतिक ताल मानिने जानकारी गराए । घोडाघोडी ताल सहित २४ वटा तालहरूमा चराहरूको मुख्य बासस्थान भएको उनले बताए । चौधरीले पहिले दुई हजार २ सयको हाराहारी जलपन्छी रहेको घोडाघोडी क्षेत्रमा अहिले सङ्ख्या घटेर १ हजार १ सयमा झरेको उनले बताए ।
बच्चा हुर्काउने सुरक्षित स्थान असुरक्षित बन्दै जानु, आहार घट्नु र प्रतिकूल मौसमले जलपन्छीको सङ्ख्या घटाउने मुख्य कारण भएको उनले बताए । घोडाघोडी क्षेत्र रैथाने र आगन्तुक दुबै प्रकारका चराहरूको लागि महत्वपूर्ण बासस्थान मानिने बताउदै उनले ३ सय ८१ प्रजातिका चरा पाइने गरेको जानकारी गराए । सुदूरपश्चिम प्रदेश सरकारले २०७८ फागुन २७ गते घोडाघोडी क्षेत्रलाई नेपालकै पहिलो ‘चरा अभय आरण्य’ घोषणा गरेको थियो ।
