असोज २३ धनगढी । कैलाली उद्योग वाणिज्य संघको ५१ औं साधारणसभा तथा निर्वाचनमा दुई वटा प्यानल चुनावी मैदानमा उत्रिएका छन । यही असोज २५ गते हुने निर्वाचनका लागि वर्तमान वरिष्ठ उपाध्यक्ष पुष्करराज ओझा र पूर्व महासचिव रुपेश स्वाँर गरी दुई वटा प्यानल चुनावी मैदानमा उत्रिएका हुन ।
निर्बाचन नजिकिँदै जाँदा व्यवसायीबीच चुनावी सरगर्मी बढ्दै गएको छ । दुई वटा मुख्य समूह र केही स्वतन्त्र उम्मेदवार बीच रोचक प्रतिस्पर्धा हुने देखिएको छ । सुदूरपश्चिमकै पुरानो र प्रभावशाली व्यवसायिक संस्था मानिने कैलाली उद्योग वाणिज्य संघमा यसपटक अध्यक्ष देखि सदस्य सम्मका सबै पदका लागि उम्मेदवारी दर्ता सम्पन्न भइसकेको छ ।
अध्यक्ष पदका लागि वर्तमान वरिष्ठ उपाध्यक्ष पुष्करराज ओझा र पूर्वमहा सचिव रुपेश स्वाँरले छुट्टाछुट्टै प्यानल बनाएर उम्मेदवारी दिएका छन् । त्यसैगरी पदाधिकारी तथा सदस्य पदका लागि ६ जना व्यवसायीले स्वतन्त्र रूपमा उम्मेदवारी दिएका छन् ।
उम्मेदवारी दर्ता पछि दुवै समूहका उम्मेदवारहरूले मतदाताको घरदैलो गर्नै गरेका छन । बिहान देखि बेलुका सम्म उम्मेदवार र उनका समर्थकहरू उद्योगी–व्यवसायी भेटघाटमा व्यस्त छन् भने चुनावी सभाहरू, मतदाता भेट कार्यक्रम र सामाजिक सञ्जाल मार्फत प्रचार–प्रसार पनि तीव्र भइरहेको छ ।
अध्यक्ष पदका उम्मेदवार पुष्करराज ओझाले आफ्नो टिममा सबै क्षेत्रका सक्रिय व्यवसायीलाई समावेश गरिएको बताउँदै आगामी कार्यकालमा व्यवसाय प्रवद्र्धनका ठोस कार्यक्रम ल्याउने प्रतिबद्धता जनाएका छन ।
त्यसैगरी अर्का उम्मेदवार रुपेश स्वाँरले आफू व्यवसायीहरूको सुझाव र मागका आधारमा उम्मेदवार बनेको बताएका छन । एक पटक अध्यक्ष पदमा पराजित भइसकेका स्वाँरले यसपटक न्याय हुने र विजयी हुने विश्वास व्यक्त गरेका छन । संघका २ हजार २ सय ७४ जना सदस्य यसपटक मतदानमा सहभागी हुने भएका छन् ।
संघमा आवद्ध व्यवसायीहरूको ठूलो संख्याका कारण निर्वाचनले स्थानीय व्यापारिहरुमा आमनिर्वाचनकै जस्तो माहोल बनाएको छ । धनगढीका होटल,पसल देखि व्यापारिक प्रतिष्ठान सम्म अहिले संघको चुनावकै चर्चा हुने गरेको छ ।
