असार १३ धनगढी । कैलालीको गौरीगङ्गा नगरपालिका वडा नम्बर–७ मा रहेको सुनपाल सामुदायिक वन उपभोक्ता समूहले २२ जना विपन्न युवायुवतीलाई ४५ दिने निःशुल्क ड्राइभिङ तालिम प्रदान गरेको छ ।
समूहले आफ्नो वार्षिक कार्यक्रम अनुसार जीविकोपार्जनमा सघाउ पु¥याइ रोजगार प्रवर्धन गर्ने उद्देश्यले २२ जना विपन्न युवायुवतीलाई ४५ दिने निःशुल्क ड्राइभिङ तालिम प्रदान गरेको हो । समूहका अध्यक्ष रामबहादुर कामीले वन ऐन, २०७६ को प्रावधान बमोजिम कार्यक्रम आयोजना गरिएको जानकारी गराए ।
ऐनले सामुदायिक वनको आम्दानीको निश्चित हिस्सा वन संरक्षण बाहेक विपन्नमुखी तथा सामूहिक हितका कार्यक्रममा खर्च गर्नुपर्ने व्यवस्था गरेको छ । यही व्यवस्थालाई टेकेर चालु आर्थिक वर्ष २०८१÷८२ को स्वीकृत कार्यक्रम अन्तर्गत तालिम दिइएको उनले बताए । गत वैशाख १३ गते सुरु भई जेठ २६ गते सम्पन्न भएको उक्त ४५ दिने तालिम मनकामना ड्राइभिङ सेन्टर मसुरियाको प्राविधिक सहकार्यमा सञ्चालन गरिएको उनले बताए ।
तालिममा सहभागीलाई कार्यक्रमको आयोजना गरी प्रमाणपत्र वितरण गरिएको उनले बताए । तालिम समापन कार्यक्रमका प्रमुख अतिथि सवडिभिजन वन कार्यालय मसुरियाका वरिष्ठ वन अधिकृत विश्वराज पण्डितले सामुदायिक वनले वन संरक्षणसँगै सामाजिक तथा आर्थिक विकासमा खेलेको भूमिका प्रेरणादायी भएको बताए ।
उनले यस्ता सकारात्मक कामको प्रचार गरी अन्य समूहलाई पनि प्रोत्साहित गर्नुपर्ने बताए । कार्यक्रममा वडा नम्बरं ७ का अध्यक्ष आशाराम चौधरीले यस्ता सीपमूलक तालिमले युवालाई उद्यमशील र आत्मनिर्भर बनाउने बताउँदै आवश्यक सहयोगका लागि वडा र पालिकाबाट समन्वय गर्ने प्रतिबद्धता व्यक्त गर ।
तालिमको प्रभावकारिता देखिएको मनकामना ड्राइभिङ सेन्टरका व्यवस्थापक तथा प्रशिक्षक नैनबहादुर विष्टले बताए । दुई सय २५ घण्टाको तालिम अवधिमा सहभागीले जिप÷कार चलाउने सीपका साथै सैद्धान्तिक ज्ञान, ट्रायल अभ्यास र सवारी चालक अनुमतिपत्र (लाइसेन्स) परीक्षाको तयारी गरेका थिए ।
तालिम पछि १८ जनाले लाइसेन्सको लिखित परीक्षा दिएकोमा १७ जना उतीर्ण भएका छन । तीमध्ये पाँच जनाले प्रयोगात्मक परीक्षा (ट्रायल) समेत पास गरी लाइसेन्स प्राप्त गरिसकेका छन् भने बाँकी पनि लाइसेन्स लिने प्रक्रियामा रहेका छन । सामुदायिक वनले ड्राइभिङका अतिरिक्त पलम्बिङ, सिलाइ कटाइ र ब्युटिसियन जस्ता अन्य सीपमूलक तालिम पनि सञ्चालन गरिरहेको उनले जानकारी गराए ।
