माघ ०१ धनगढी । सरकारले कैलालीको गोदावरी नगरपालिका वडा नम्बर– ७ र ८ मा रहेको हरैया विशेष आर्थिक क्षेत्र (सेज) लाई सार्वजनिक निजी क्षेत्र बिच साझेदारी (पीपीपी) मोडेलबाट सञ्चालन गर्ने तयारी गरिएको छ ।
मंगलबार उद्योग वाणिज्य तथा आपूर्ति मन्त्री दामोदर भण्डारीले सेज क्षेत्रको अवलोकन गर्दै प्रारम्भिक काम सकेर पीपीपी मोडेलमा सञ्चालन गर्ने तयारी गरिएको जानकारी गराएका हुन । उद्योग वाणिज्य तथा आपूर्ति मन्त्री भण्डारीले प्रारम्भिक काम सकियो भने चाडै यसलाई पीपीपी मोडलबारे सुरु गर्ने बताए ।
मन्त्री भण्डारीले सुदूरपश्चिमका लागानीकर्ताहरुले तोकिएको सीमा क्षेत्र भित्रका ब्लकहरूमा सेजको डिजाइनमा गरिएको डिपीआर अनुसार ब्लक बनाउन सकोस् र त्यो ब्लकलाई भोलि औद्योगिक विकासका लागि क्रमशः भाडामा दिएर त्यसको मुनाफा लगानीकर्ताले लीन सकोस् भन्ने उदेश्यका साथ काम गरिने बताए ।
सरकारको बजेट मात्रै पर्खिएर नहुने बताउदै उनले सरकारको बजेटलाई पर्खिनु भन्दा पनि निजी क्षेत्रको बजेट, बाह्य लगानी, आन्तरिक लगानीबाट पनि अहिलेका पूर्वाधारलाई प्राथमिकतामा राख्ने गरी सरकारले योजना अगाडि बढाएको जानकारी गराए । विशेष आर्थिक क्षेत्र प्राधिकरणका प्रमुख कार्यकारी अधिकृत छत्र कटुवालले इआइएका लागि कागजात वन विभागमा पठाइएकाले स्वीकृत हुने बित्तिकै काम अगाडि बढाइने बताए ।
उनले सेजको डिपीआर निर्माणका क्रममा रहेको बताए । हरैयामा सेज निर्माणका लागि केही दिनमै सम्बन्धित सरोकारवालाहरुसँग छलफल गर्ने तयारी पनि सरकारले गरेको बताईएको छ । हरैया विशेष आर्थिक क्षेत्र ९ सय बिघा क्षेत्रफलमा फैलिएको छ । यस क्षेत्रमा काम अगाडि बढाउने भन्दै ५ वर्ष अघि २०७६ सालमा तत्कालीन उद्योग, वाणिज्य तथा आपूर्ति मन्त्री लेखराज भट्टले पनि अवलोकन गरेका थिए ।
