पौष १० धनगढी । कैलालीको चिसापानी–राजकाँडा जालपा देवी केबुलकारको पुस १३ गते शिलान्यास गरिने भएको छ । नेपाल सरकारका परराष्ट्र मन्त्री डा. आर्जु राणा देउवाले केबलकारको शिलान्यास गर्ने जानकारी गराईएको छ ।
कार्यक्रममा उद्योग मन्त्री दामोदर भण्डारी, पर्यटन राज्यमन्त्री अरुण कुमार चौधरी लगायतको सहभागिता रहने आयोजकले बुधवार पत्रकार सम्मेलन मार्फत जानकारी गराएको हो । केबलकारका सञ्चालक सूर्यबहादुर थापाले केबलकार सुदूरपश्चिम प्रदेशको पर्यटन विकासको मेरुदण्ड बन्ने बताउदै हजार जनालाई प्रत्यक्ष रोजगारीमा जोड्ने योजना भएको बताए ।
बर्दिया राष्ट्रिय निकुञ्ज, कर्णालीमा मिनी पानी जहाज, रारा ताल, टिकापुरपार्क, रामारोशन जस्ता पर्यटकीय क्षेत्रहरूलाई सँगै जोडेर अघि बढ्ने उनले बताए । भारतको उत्तर प्रदेशका जनताको आवागमनलाई जोड दिएमा मात्रै पनि सुदूरपश्चिम पर्यटनको हब बन्ने उनले बताए । पुस १३ गते शिलान्यास गरी एक वर्ष भित्र केबलकार सञ्चालन गर्ने बताइएको छ ।
