पौष २८ दाङ । नेपालगञ्जबाट काठमाडौँतर्फ जाँदै गरेको यात्रुबाहक बस दाङको भालुबाङस्थित राप्ति नदीमा खस्दा मृत्यु हुनेको संख्या १२ पुगेको छ । दाङका प्रहरी प्रमुख प्रहरी उपरीक्षक राम बहादुर केसीका अनुसार गए राति १ बजे सम्म मृत्यु हुनेको संख्या १२ पुगेको हो । उनका अनुसार हाल सम्म चार जना यात्रुको मात्र सनाखत हुन सकेको बताईएको छ ।
अन्य मृतकको सनाखत हुन सकेको छैन । शवलाई लमहीस्थित लमही अस्पतालमा राखिएको छ । दुर्घटनामा परी घाइते भएका मध्ये आठ जनाको बाँकेको नेपालगञ्ज मेडिकल कलेज शिक्षण अस्पताल कोहलपुरमा उपचार भइरहेको इलाका प्रहरी कार्यालय कोहलपुरका प्रमुख प्रहरी नायव उपरीक्षक सुन्दर तिवारीले जानकारी दिए ।
उनका अनुसार पाँचवटा एम्बुलेन्समा घाईतेलाई शिक्षण अस्पताल कोहलपुरमा ल्याइएको थियो । नमस्ते यातायातको भे १ ख ३९१२ नम्बरको बस शुक्रबार राति १०ः३० बजे राप्ति नदीमा खसेको बताईएको छ । बसका चालक सल्यान घर भएका २८ वर्षिय लालबहादुर नेपालीलाई नियन्त्रणमा लिएको प्रहरीले जनाएको छ ।
