पौष १४ धनगढी । भारतबाट आउने नेपालीहरुमा दिनहुँ कोरोनाको संक्रमण देखिन थालेको छ । सुदूरपश्चिम प्रदेश आपतकालीन कार्य सञ्चालन केन्द्र धनगढीका अनुसार भारतबाट आउने नेपालीहरुमा दिनहुँ कोरोनाको संक्रमण देखिन थालेको हो । भारतमा कोरोना भाइरसको नयाँ भेरिएण्ट जेएन वान देखिन थाले पछि गौरीफन्टा नाकामा परीक्षणलाई तीव्र बनाईएको छ । पछिल्लो १० दिनमा भारतबाट घर फर्किने ९ जनामा कोरोनाको संक्रमण देखिएको छ ।
गौरीफण्टास्थित हेल्थ डेस्कका इन्चार्ज गणेश साउले पुस ३ गते देखि १३ गते सम्म ३ सय जनाको एण्टीजेन परीक्षण गर्दा ९ जनामा संक्रमण देखिएको जानकारी गराए । भारतको दिल्ली, चन्डीगढ, बेंगलोर र हैदरावाद लगायतका क्षेत्रबाट आउने नेपाल ीहरुमा कोरोनाको संक्रमण देखिएको उनले बताए । अहिले लक्षण देखिएका र शंकास्पद व्यक्तिको मात्रै परीक्षण भइरहेको बताउदै उनले भारतका विभिन्न राज्यमा नयाँ भेरिएण्टको संक्रमण बढिरहेको बताए ।
संक्रमण पुष्टि भएकाहरूको नमुना परीक्षणका लागि राष्ट्रिय प्रयोगशालामा पठाइएको साउदले बताए । नयाँ भेरिएण्ट जेएन वान हो वा होइन भन्ने पहिचान गर्न प्रयोगशालामा नमुना पठाइएको हो । कञ्चनपुरको गड्डाचौकी नाकामा पनि हेल्थ डेस्कले शंकास्पद व्यक्तिलाई नियमित रूपमा परीक्षण गर्दै आएको छ । भारतमा संक्रमण बढ्न थालेपछि पुस ७ देखि परीक्षण सुरु गरिएको हेल्थ डेस्कका प्रमुख प्रेमसिंह भण्डारीले जानकारी गराए । गड्डाचौकीमा भने हालसम्म संक्रमणको पुष्टि नभएको उनले बताए ।
भण्डारीले दैनिक साढे दुई सय जना नेपाल भित्रिरहेको जानकारी गराउदै ३०÷४० जनाको मात्रै परीक्षण भइरहेको बताए । भारतको दिल्ली र देहरादुनसम्म चल्नै मैत्री बसहरूले नाकामा रोक्न अटेर गर्दा परीक्षणमा समस्या भएको उनले बताए । नाकामा परीक्षणका लागि बसहरू रोक्न स्थानीय प्रशासन र सुरक्षा निकायसँग आग्रह गरिएको उनले बताए । नाकामा परीक्षण नहुँदा र संक्रमण देखिएकालाई पनि सार्वजनिक यातायातमै घरतर्फ पठाउँदा समुदायमै संक्रमण फैलिन सक्ने जोखिम रहेको उनले बताए ।
