असोज २१ धनगढी । भारतबाट लामो यात्रा गरेर घर फर्किएका नेपाली यात्रुहरूबार्ट कैलालीको त्रिनगर भन्सार नाकामा अटो चालकले ४० रुपैयाको बाटोमा ८ सय सम्म असुली गर्ने गरेका छन ।
तोकिएको भाडाभन्दा कैयौँ गुणा बढी रकम असुल्ने, सामान बोकिदिने र बाटोमा हुने चेकजाँचमा प्रहरीसँग समन्वय गरिदिने भन्दै यात्रुसँग अटो चालकले ४० रुपैयाको बाटोमा ८ सय सम्म असुली गर्ने गरेका हुन ।
त्रिनगर भन्सार नाकाबाट धनगढी ट्राफिक चौराह सम्मको अटो भाडा ३० रुपैयाँ र धनगढी बसपार्कसम्म ४० रुपैयाँ तोकिएको भए पनि भारतबाट फर्किएका केही यात्रुसँग अटो चालकले पाँच सयदेखि आठ सय रुपैयाँसम्म असुल्ने गरेको पाईएको हो ।
भारतको तामिलनाडुबाट घर फर्किएका आदित्य खड्काले त्रिनगर नाका पुग्नेबित्तिकै अटो चालक र सामान बोक्ने व्यक्तिले घेरामा पारेको बताउदै धनगढी बसपार्कसम्म पुग्न अटो चालकले आठ सय रुपैयाँ मागेको बताए ।
उक्त विषयमा उनले ट्राफिक प्रहरी समक्ष गुनासो गरेपछि प्रहरीले सुप्रप ०१–००१ ह ७८५५ नम्बरको अटो चालकलाई नियन्त्रणमा लिएको बताए ।
प्रहरीको सोधपुछका क्रममा भारतबाट फर्किएका अछामको रामारोशनका कमल परियारसँग पनि सामान बोकेको भन्दै धनगढी बसपार्कसम्म आठ सय रुपैयाँ लिएको खुलेको थियो ।
प्रहरीले परियारबाट असुल गरिएको रकम फिर्ता गराएको जनाएको छ । त्यसपछि सुप्रप ०१–००१ ह ४७६७ नम्बरको अटो र चालकलाई समेत नियन्त्रणमा लिएर मुद्दा दर्ता गरी थप अनुसन्धान अघि बढाइएको छ ।
स्थानीयका अनुसार बिहानको समयमा भारतबाट नेपाल फर्किने नेपाली यात्रुको चाप बढी हुन्छ । त्यही समयमा सीमा नाकामा पर्याप्त प्रहरी उपस्थिति नहुँदा त्यसको फाइदा उठाउँदै केही अटो चालक र बिचौलियाले यात्रुसँग मनपरी रकम असुल्ने गरेका छन् ।
भारतबाट फर्किएका यात्रुलाई लक्षित गरी अटो व्यवसायी र सामान बोक्ने व्यक्तिहरूको मिलेमतोमा आर्थिक शोषण भइरहेको गुनासो बढेको छ । विशेषगरी लामो यात्रापछि थकित भएका र धेरै सामान बोकेका यात्रुलाई लक्षित गर्ने गरिएको बताइएको छ ।
एक जना अटो चालकका अनुसार त्रिनगर नाकाबाट महँगो भाडा लिएर यात्रुलाई धनगढी चौराहा वा बसपार्कसम्म पु¥याउने र त्यसपछि जिल्लाका अन्य क्षेत्र तथा जिल्लाबाहिर जाने यात्रुलाई थप रकम लिएर बसमा पठाउने प्रवृत्ति समेत रहेको छ ।
सीमा नाकामा हुने चेकजाँच र प्रशासनिक प्रक्रियालाई देखाएर यात्रुमा त्रास सिर्जना गर्ने र त्यसकै नाममा अतिरिक्त रकम असुल्ने प्रवृत्तिमाथि पनि निगरानी आवश्यक देखिएको छ ।
सीमा नाकामा यात्रु सहायता कक्ष, प्रभावकारी गुनासो सुनुवाइ र नियमित अनुगमनको व्यवस्था गर्न सके यात्रु ठगी तथा शोषण नियन्त्रण गर्न सकिने देखिन्छ । जिल्ला प्रहरी कार्यालय कैलालीले तोकिएको भन्दा बढी भाडा असुल्ने जोसुकैलाई कानुनी कारबाहीको दायरामा ल्याउने जनाएको छ ।
प्रहरीले यात्रुको सुरक्षाका लागि विभिन्न स्थानमा प्रहरी परिचालन गरिएको र समस्या परेमा तत्काल प्रहरीसँग सहयोग माग्न सकिने जनाएको छ ।
भारतमा रोजगारी तथा अन्य कामका लागि गएर चाडपर्वमा घर फर्किने नेपालीको संख्या बढिरहेका बेला सीमा नाकामै हुने यस्तो असुलीले उनीहरूलाई थप समस्या पार्ने गरेको छ ।
त्यसैले सम्बन्धित निकायले तोकिएको भाडा कार्यान्वयन गराउनुका साथै यात्रुको सहज र सुरक्षित आवागमनका लागि त्रिनगर नाकामा प्रभावकारी अनुगमन र यात्रु सहायता व्यवस्था गर्न आवश्यक देखिएको छ ।
