असोज १४ धनगढी । कैलाली र कञ्चनपुरका विभिन्न स्थानबाट प्रहरीले ३ लाख ५७ हजार ४ सय रुपैयाँ बराबरका भन्सार छलीका सामान तथा बाख्रा बरामद गरेको छ । कैलालीका विभिन्न स्थानबाट मंगलबार जिल्ला प्रहरी कार्यालय कैलाली तथा मातहतका कार्यालयबाट खटिएको प्रहरी टोलीले भारतबाट भन्सार छली गरी ल्याइएका सुर्ती, खेलौना, सुटपिस, कट्टु, पटका लगायतका सामान बरामद
गरेको हो ।
बरामद सामानको अन्दाजी मूल्य १ लाख ७१ हजार ९ सय रुपैयाँ रहेको प्रहरीले जनाएको छ । त्यसैगरी, कञ्चनपुरको भीमदत्त नगरपालिका वडा नम्बर–३ भाँसीबाट २५ हजार ५ सय रुपैयाँ बराबरका किराना लगायतका सामान बरामद गरिएको छ । वडा प्रहरी कार्यालय महेन्द्रनगरबाट खटिएको टोलीले मंगलबार बेलुकी बेवारिसे अवस्थामा ती सामान फेला पारेको हो ।
त्यसैगरी, भीमदत्त नगरपालिका वडा नम्बर–११ भुजेलाबाट भारततर्फ भन्सार छली गरी लैजाँदै गरेका १ लाख ६० हजार रुपैयाँ बराबरका बाख्रा पनि प्रहरीले बरामद गरेको छ । मंगलबार साँझ इलाका प्रहरी कार्यालय गड्डाचौकीबाट खटिएको टोलीले बेवारिसे अवस्थामा बाख्रा फेला पारेको हो । बरामद सामान तथा बाख्रा मध्ये बाख्रालाई आवश्यक कारबाहीका लागि कञ्चनपुर भन्सार कार्यालय गड्डाचौकी पठाइएको प्रहरीले जनाएको छ ।
