असोज १४ धनगढी । कैलालीको गेटास्थित शहीद दशरथ चन्द स्वास्थ्य विज्ञान विश्वविद्यालयमा चिकित्सा शिक्षा कार्यक्रम सञ्चालनका लागि चिकित्सा शिक्षा आयोगको टोलीले स्थलगत अनुगमन सुरु गरेको छ । विश्वविद्यालयमा चिकित्सा शिक्षा कार्यक्रम सञ्चालनको अनुमति तथा विद्यार्थीका लागि सिट संख्या निर्धारण गर्ने प्रक्रिया अन्तर्गत आयोगको टोलीले अनुगमन सुरु गरेको हो ।
टोलीले विश्वविद्यालयमा आवश्यक भौतिक पूर्वाधार, जनशक्ति, शिक्षण संस्था, प्रयोगशाला तथा शिक्षण अस्पतालको अवस्थाबारे अध्ययन गर्ने बताईएको छ । अनुगमनका क्रममा विश्वविद्यालय परिसर, शिक्षण भवन, प्रयोगशाला, अस्पताल तथा विद्यार्थीको अध्ययन र प्रयोगात्मक अभ्याससँग सम्बन्धित पूर्वाधारको निरीक्षण गरिनेछ ।
आयोगले निर्धारण गरेको मापदण्ड अनुसार विश्वविद्यालयले आवश्यक पूर्वाधार र जनशक्ति व्यवस्थापन गरे–नगरेको समेत मूल्यांकन गरिनेछ । विश्वविद्यालय र सुदूरपश्चिम प्रदेश सरकारबीच भएको सम्झौता अनुसार प्रदेश सरकार मातहतका अस्पताललाई पनि विद्यार्थीको प्रयोगात्मक तथा क्लिनिकल अभ्यासका लागि प्रयोग गर्ने तयारी गरिएको छ ।
त्यसअनुसार सम्बन्धित अस्पतालको भौतिक अवस्था, उपलब्ध स्वास्थ्य सेवा, जनशक्ति तथा विद्यार्थीलाई अभ्यास गराउन सकिने क्षमताबारे समेत आयोगको टोलीले अध्ययन गर्नेछ । गेटामा चिकित्सा शिक्षा सञ्चालनका लागि विश्वविद्यालयले पहिलो चरणमा एमबीबीएस, बीएस्सी नर्सिङ, मेडिकल ल्याब टेक्नोलोजी र अप्टोमेट्री लगायतका शैक्षिक कार्यक्रम सञ्चालन गर्ने तयारी गरेको छ ।
यी कार्यक्रम सञ्चालनमा आएपछि सुदूरपश्चिमका विद्यार्थीलाई चिकित्सा तथा स्वास्थ्य शिक्षा अध्ययनका लागि प्रदेशबाहिर जानुपर्ने अवस्था केही हदसम्म कम हुने अपेक्षा गरिएको छ । एमबीबीएस कार्यक्रम सञ्चालनका लागि गेटामा रहेको अस्पताललाई शिक्षण अस्पतालका रूपमा विकास गर्ने तयारी समेत अघि बढाइएको छ ।
अस्पतालको क्षमता विस्तारसँगै आवश्यक उपकरण, जनशक्ति तथा अन्य पूर्वाधार व्यवस्थापनलाई प्राथमिकतामा राखिएको विश्वविद्यालयले जनाएको छ । आफ्नै शिक्षण अस्पतालसँगै प्रदेशका अन्य अस्पताललाई समेत विद्यार्थीको क्लिनिकल अभ्यासमा जोड्ने योजना विश्वविद्यालयको रहेको छ । त्यसै क्रममा विश्वविद्यालयले सुदूरपश्चिमका चार वटा अस्पतालसँग सम्झौता गरिसकेको छ ।
सेती प्रादेशिक अस्पताल, महाकाली प्रादेशिक अस्पताल, टीकापुर प्रादेशिक अस्पताल र लम्कीचुहा अस्पताललाई विश्वविद्यालयको चिकित्सा शिक्षा कार्यक्रमसँग जोड्ने गरी सम्झौता गरिएको छ । सम्झौता अनुसार ती अस्पताललाई विद्यार्थीको क्लिनिकल अभ्यास, तालिम तथा स्वास्थ्य सम्बन्धी अनुसन्धानका लागि प्रयोग गर्ने तयारी गरिएको छ ।
आयोगको टोलीले सम्झौता भएका चारवटै अस्पतालको समेत अनुगमन गर्ने जनाइएको छ । गेटामा चिकित्सा शिक्षा कार्यक्रम सञ्चालनका लागि आवश्यक मापदण्ड पूरा भए–नभएको मूल्यांकन गर्न आयोगको स्थलगत अनुगमनलाई महत्वपूर्ण चरणका रूपमा लिइएको छ । अनुगमनपछि पूर्वाधार, जनशक्ति, अस्पताल, प्रयोगशाला, उपकरण तथा शैक्षिक वातावरणको अवस्थाका आधारमा आयोगले कार्यक्रम सञ्चालनको अनुमति र विद्यार्थी सिट संख्या निर्धारण गर्नेछ ।
लामो समयदेखि गेटामा स्वास्थ्य विज्ञान विश्वविद्यालय सञ्चालन र चिकित्सा शिक्षा सुरु हुने प्रतीक्षामा रहेका बेला आयोगको अनुगमनसँगै प्रक्रिया अघि बढेको छ । अनुगमनबाट प्राप्त सुझाव र आयोगले तोकेका मापदण्ड पूरा गर्दै विश्वविद्यालयले चिकित्सा शिक्षा कार्यक्रम सञ्चालनको तयारीलाई थप अघि बढाउने जनाएको छ ।
