असोज १४ कञ्चनपुर । कञ्चनपुरको कृष्णपुर नगरपालिकाले नगर क्षेत्रका ६ वटा सामुदायिक विद्यालयलाई विद्यालय बस हस्तान्तरण गरेको छ । दुर्गम तथा टाढाका बस्तीबाट विद्यालय आउने विद्यार्थीलाई सहज रूपमा विद्यालयसम्म पुग्ने वातावरण बनाउने उद्देश्यले नगरपालिकाले उपलब्ध गराएका बस हस्तान्तरण गरेको हो । बुधबार कार्यक्रम आयोजना गरी नगरपालिकाले ६ वटा सामुदायिक विद्यालयलाई बस हस्तान्तरण गरेको हो ।
नगरपालिकाले गत आर्थिक वर्षको बजेट अन्तर्गत बस खरिद गरेको जनाएको छ । सुरुमा युरो–३ मापदण्डका बस खरिद गर्ने योजना रहे पनि सरकारले उक्त मापदण्डमा रोक लगाएपछि युरो–६ मापदण्डका बस खरिद गरिएको नगरपालिकाले जनाएको छ । नगरपालिकाका प्रमुख हेमराज ओझाका अनुसार दुर्गम क्षेत्रका विद्यार्थीलाई सहज रूपमा विद्यालयसँग जोड्न र विद्यालय सम्मको आवागमनलाई व्यवस्थित बनाउन बस सञ्चालनमा ल्याइएको हो ।
“दूरदराजका विद्यार्थीलाई विद्यालयसम्म आउन–जान सहज होस् र शिक्षामा सबैको पहुँच सुनिश्चित गर्न बसको व्यवस्था गरिएको नगर प्रमुख ओझाले बताए । नगरपालिकाले श्री महाकाली माध्यमिक विद्यालय, श्री उदय माध्यमिक विद्यालय, श्री नन्द माध्यमिक विद्यालय, श्री कृष्ण माध्यमिक विद्यालय, श्री विणा माध्यमिक विद्यालय र श्री राष्ट्रिय माध्यमिक विद्यालयलाई बस हस्तान्तरण गरेको हो । नगरपालिकाले बस सञ्चालनका लागि प्रस्ताव आह्वान गरेको थियो ।
विद्यालयले बस नियमित रूपमा सञ्चालन गर्ने सुनिश्चितता गरेपछि बस हस्तान्तरण गरिएको नगर प्रमुख ओझाले बताए । कृष्णपुर नगरपालिकाले शिक्षा क्षेत्रको सुधारलाई प्राथमिकतामा राख्दै सामुदायिक विद्यालयमा तहगत दरबन्दी अनुसार प्रधानाध्यापक तथा शिक्षक व्यवस्थापन, नगर शिक्षकको व्यवस्था र परीक्षाका लागि प्रश्नपत्र उपलब्ध गराउने लगायतका काम गर्दै आएको जनाएको छ ।
त्यसैगरी गत चालु आर्थिक वर्षमा नगरपालिकाले सामुदायिक विद्यालयका लागि करिब ३ करोड ६९ लाख रुपैयाँ बराबरको सूचना तथा सञ्चार प्रविधि (आईसीटी) सामग्री समेत उपलब्ध गराएको जनाएको छ । शिक्षा, स्वास्थ्य लगायतका क्षेत्रमा विभिन्न योजना तथा कार्यक्रम मार्फत सेवा सुधारको काम अघि बढाइएको नगरपालिकाले जनाएको छ ।
हस्तान्तरण गरिएका बस टाटा कम्पनीले निर्माण गरेका २०२६ मोडलका बस हुन् । प्रत्येक बसको मूल्य करिब ४६ लाख ४६ हजार रुपैयाँ रहेको नगरपालिकाले जनाएको छ । सानो उमेरका बालबालिका सहित टाढाका बस्तीबाट विद्यालय आउने विद्यार्थीलाई सुरक्षित र सहज आवागमनको व्यवस्था गर्ने उद्देश्यले बस सञ्चालनमा ल्याइएको नगरपालिकाले जनाएको छ । आगामी दिनमा नगरपालिका भित्र रहेका अन्य सामुदायिक विद्यालयलाई समेत क्रमशः बस उपलब्ध गराउने योजना रहेको कृष्णपुर नगरपालिकाले जनाएको छ ।
