चैत्र २६ बाजुरा । बाजुराको मार्तडी कोल्टी सडक निर्माणको काममा ढिलाई हुँदा यात्रुहरुले सास्ती खेप्नु परेको छ । सदरमुकाम मार्तडी–कोल्टी सम्मको झण्डै ४२ किलोमिटर सडक कालोपत्रे हुन नसक्दा यात्रुहरुले सास्ती खेप्नु परेको हो । सडक कालोपत्रे नहुँदा धनगढी, अत्तरिया, महेन्द्रनगर, नेपालगञ्ज र काठमाडांै लगायतका विभिन्न ठाउँबाट मार्तडी देखि कोल्टी आउने लामो दुरीका सवारी साधानले पनि जोखिम मोल्नु परेको अवस्था छ ।
ठेकेदार कम्पनीले कालोपत्रेको जिम्मा लिएको झण्डै सात वर्ष हुँदा सम्म पनि जिल्लाको मार्तडी कोल्टी सडक अझै कालोपत्रे नभएको स्थानीयले बताएका छन । सुदूरपश्चिम यातायातका बस चालक मदन कार्कीले सडक कालोपेत्र नहुँदा सवारी साधन लगायत यात्रुहरुले जोखिम पूर्ण यात्रा गर्नु परेको बताए ।
मार्तडी–कोल्टी सडकमा अहिले सवारी साधान चलाउन निकै सकस हुने गरेको उनले बताए । स्थानीयको आवश्यकत्ताका लागि जबरजस्ती गाडी कोल्टी लिने गरेको उनले बताए । सडक सञ्चालनमा आए पनि खाल्डा खुल्डीका कारण लामो दुरीका सवारी साधानलाई निकै जोमिम बढ्दै गएको कार्कीले बताए । २०७८ सालको असारमै काम सम्पन्न गर्ने गरी २०७६ असारमा धुलिखेल ग्वाल्भा श्याम एण्ड शङ्कर प्रालि काठमाडौं र बाँनिया कोटेश्वर जे.बि प्रालि हेटौँडाले सडक निर्माण कार्यको जिम्मा लिएका थिए ।
मार्तडी बसपार्क देखि चुथीको झण्डै ९ किलोमिटर सडक कालोपत्रेका लागि २३ करोडमा धुलिखेल ग्वाल्भा श्याम एण्ड शङ्कर प्रालि काठमाडौं र चुथीदेखि ढम्कने झण्डै ६ किलोमिटर र ढम्केने देखि कोल्टी सम्मको २६ किलोमिटर सडक बाँनिया कोटेश्वर जे.बि प्रालि हेटौडाले ६२ करोडमा जिम्मा लिएका हुन् । मार्तडी देखि चुथी सम्मको ९ किलोमिटर सडक पीच गर्ने काम सम्पन्न भएपनि उता ढम्कने देखि कोल्टी सम्मको ३१ किलोमिटर सडक भने अँझै पीच भएको छैन ।
ठेकदारको लाफरबाहीले उक्त सडक निर्माणको काममा निकै ढिलाइ भएपछि अहिले मार्तडी देखि कोल्टी सम्म जाने यात्रुलाई हिउँद बर्खाको समय सधै सास्ती खेप्नु परेको छ । मार्तडी देखि कोल्टी सम्मको ४२ किलोमिटर सडक कालोपत्रे गर्नका लागि ८५ करोडमा ठेक्का लिने ती दुई वटा कम्पनीले ३५ करोड भन्दा बढी पहिलो किस्ता रकम भुक्तानी भने लिइसकेको बतईएको छ ।
कात्तिक देखि कोल्टीमा बस सञ्चालन भएको दुइ महिनामै सुदूरपश्चिम र महाकाली गरी दुइ वटा बस दुर्घटनामा परिसकेको बताइएको छ । घटनामा एक जनाको ज्यान गएको थियो भने दर्जनौ यात्रु घाइते भएका थिए । आफूले अरुलाई जिम्मा दिएको र उनीहरुले काम नगरेकाले मार्तडी कोल्टी सडक निर्माणको काममा ढिलाई भएको ठेकेदार कम्पनीले जनाएको छ ।
ठेकेदार कम्पनीलाई फोन गर्दा यस वर्षमा मार्तडी कोल्टी सडक निर्माणको काम पुरा गर्ने गरी आफु काठमाण्डौ देखि बाजुरा आउन लागेको ठेकेदार कम्पनीका मालिक राजु बाँनीयाले बताए । यती बेला ठेकेदार कम्पनीले आफैले काम गर्ने गरी काम सुरु गरेको बताए ।
बुढीनन्दा नगरपालिका उपप्रमुख रामबहादुर बोहराले जिम्मा दिएका ठेकेदारले काम नगर्दा पहिला सडक मर्मत गर्नु पर्ने समस्या हुने गरेको बताउदै अहिले आफैले काम गर्ने भएकाले उक्त समस्या नभएको बताए ।
धेरै पटक उक्त कम्पनीलाई फोन गरेको बताउदै उनले अहिले बल्ल ठेकेदारसँग कुरा भएको बताए । त्यसैगरी भौतिक पुर्वाधार कार्यालय अछामका प्रमुख जङ्गबहादुर थापाले आफूले जिम्मा लिएको काम आफैले पुरा गर्ने गरी अहिले काम सुरु गरेको जानकारी गराए ।
