चैत्र २६ धनगढी । नेपाल पत्रकार महासंघ कैलाली शाखा सरकारको विज्ञापन नीति विरुद्ध आन्दोलीत भएको छ । सरकारी सूचना तथा विज्ञापनहरू सरकारी सञ्चार माध्यम मार्फत मात्र प्रकाशन तथा प्रसारण गर्न निर्देशन दिइएको प्रति नेपाल पत्रकार महासंघ कैलाली शाखा आन्दोलीत भएको हो ।
बिहीबार आयोजित सरोकारवालासँगको छलफलले उक्त परिपत्र तत्काल सच्याउन सरकारसँग माग गर्ने निर्णय गरेको छ । पत्रकारहरूले यो निर्णयले स्वतन्त्र सञ्चार माध्यममा नकारात्मक असर पार्ने र निजी मिडियाको अस्तित्वमै चुनौती सिर्जना गर्ने निष्कर्ष निकालेका छन् ।
सरकारलाई दबाब दिन प्रधानमन्त्री, सञ्चार मन्त्री तथा सुदूरपश्चिम प्रदेशका प्रतिनिधिसभा सदस्यहरूलाई मोबाइल सन्देश पठाउने कार्यक्रम समेत तय गरिएको छ । ’सरकारी विज्ञापन सबैलाई बराबरी, निजी मिडियाको सम्बद्र्धन गरौँ, श्रमजीवी पत्रकारको रोजीरोटी नखोसियोस्’ भन्ने माग सहित सन्देश पठाउन महासंघले आफ्ना सदस्यहरूलाई आग्रह गरेको छ ।
शाखा अध्यक्ष श्रवण देउवाको अध्यक्षतामा सम्पन्न उक्त छलफलमा केन्द्रीय तथा प्रदेश समितिका पदाधिकारी, पूर्वपदाधिकारी, पूर्वअध्यक्ष तथा कैलालीका विभिन्न सञ्चार माध्यमका सम्पादकहरूको सहभागिता रहेको थियो ।
