चैत्र १९ धनगढी । देशभर माध्यमिक शिक्षा परीक्षा (एसईई) सुरु भएसंगै उत्तरपुस्तिका परिक्षण पनि सुरु भएको छ । विहीबार देशभर माध्यमिक शिक्षा परीक्षा (एसईई) सुरु भएसंगै उत्तरपुस्तिका परिक्षण पनि सुरु भएकोहो । एसईई परीक्षामा सुदूरपश्चिम प्रदेशबाट ५३ हजार ९ सय ७३ परीक्षाथी एसईई परिक्षमा सहभागी भएका छन् ।
शिक्षा विकास निर्देशनालय डोटीका अनुसार नियमिततर्फ ४० हजार ७ सय १०, प्राविधिक धारका एक हजार ७ सय ७८ र ग्रेडवृद्धिमा ११ हजार ४ सय ८५ गरी ५३ हजार ९ सय ७३ परीक्षार्थी एसईई परीक्षामा सहभागी भएका छन् ।
सबैभन्दा बढी कैलालीमा १८ हजार २ सय ७८ परीक्षार्थी रहेका छन् । सबैभन्दा कम बाजुरामा २ हजार ४ सय २६ परीक्षार्थी रहेका छन् । त्यसैगरी कञ्चनपुरमा १० हजार ८ सय ९८, बैतडीमा ४ हजार ५ सय २९, अछाममा ४ हजार ४ सय ९१, दार्चुलामा ३ हजार ५ सय ६८, बझाङमा ३ हजार ४ सय २१, डोटीमा ३ हजार ३ सय १४ र डडेल्धुरामा ३ हजार ४८ जना परीक्षार्थी रहेका छन् ।
निर्देशनालयका सूचना अधिकारी प्रेमलाल हरिजनले विहीबार देखि उत्तरपुस्तिका परीक्षण पनि सुरु गरिएको जानकारी गराएका छन । एसईईको नतिजा वैशाख महिना भित्रै सार्वजनिक गर्न निर्देशन केन्द्रबाट आएको बताउदै उनले सोही निर्देशन अनुसार विहीबार देखि कपी जाँचको काम पनि सुरु भएको बताए । सम्बन्धित परीक्षा केन्द्रमा नै उत्तरपुस्तिका परीक्षण गर्न सुरु गरिएको उनले बताए ।
परीक्षा सकिएको विषयको उत्तरपुस्तिका तीन दिन भित्र परीक्षण सक्ने गरी व्यवस्थापन गरेको सूचना अधिकारी हरिजनले जानकारी गराए । यसअघि जिल्ला सदरमुकाम स्थित शिक्षा इकाइले परीक्षा केन्द्रबाट उत्तरपुस्तिका संकलन गरी अन्तरजिल्ला र प्रदेशमा परीक्षण गर्ने व्यवस्था मिलाउँदै आएको थियो । शिक्षा विकास निर्देशनालयका सूचना अधिकारी हरिजनले प्रदेशभर २ सय २१ वटा परीक्षा केन्द्र रहेको बताए ।
परीक्षा सञ्चालनका लागि २ सय २१ जना केन्द्राध्यक्ष र ३ सय ७३ जना सहायक केन्द्राध्यक्ष तथा दुई हजार ७ सय २८ जना निरीक्षक परिचालन गरिएको उनले बताए । हरेक परीक्षा केन्द्रमा १५ जनाका दरले प्रदेशभर तीन हजार ३ सय १५ जना प्रहरी, ४ सय ६९ जना परीक्षा सहायक र एक हजार १ सय ३ जना सहयोगी कर्मचारी खटाइएको उनले जानकारी गराए ।
