चैत्र १८ धनगढी । सुर्खेत जिल्ला अदालतले इनिशा विक मृत्यु प्रकरणमा संलग्न चार जनालाई पुर्पक्षका लागि थुनामा पठाउन आदेश दिएको छ । जिल्ला सरकारी वकिल कार्यालयले आइतबार सामूहिक बलात्कार पछि हत्या भएको दाबी गर्दै चार जनाविरुद्ध अभियोग पत्र दर्ता गरेपछि अदालतले पुर्पक्षका लागि थुनामा पठाउन आदेश दिएको हो ।
सरकारी वकिल कार्यालयका अनुसार आरोपितहरू विरुद्ध मुलुकी अपराध संहिता, २०७४ अन्तर्गत जबर्जस्ती करणी र कर्तव्य ज्यान सम्बन्धी कसुरमा अभियोग दायर गरिएको छ । अभियोग पत्रमा दफा २१९ को उपदफा (१), (२) र (७) बमोजिम सामूहिक जबर्जस्ती करणी तथा दफा १७७ (१) बमोजिम कर्तव्य ज्यानको कसुर पुष्टि भएको उल्लेख गरिएको छ ।
अभियोजन पक्षले उनीहरूलाई आजीवन कैद सजायको माग गरेको छ । साथै, दफा २१९ (३क), दफा २२८ र दफा १८६ अनुसार पीडित पक्षलाई क्षतिपूर्ति दिलाउन पनि माग गरिएको छ । आरोपित बालकहरूलाई ‘वीरेन्द्रनगर प’, ‘वीरेन्द्रनगर ध’, ‘वीरेन्द्रनगर न’ र ‘वीरेन्द्रनगर फ’ नामकरण गरिएको छ ।
गत फागुन २३ गतेका दिन सुर्खेतको वीरेन्द्रनगर नगरपालिका वडा नम्बर–१ की १६ वर्षीया इनिशा विक विद्यालय जान्छु भन्दै घरबाट निस्किएकी थिइन् । त्यही दिन वीरेन्द्रनगर–४ स्थित जनजागरण सामुदायिक वनमा अचेत अवस्थामा भेटिएकी उनलाई अस्पतालले मृत घोषणा गरेको थियो ।
घटनापछि प्रहरीले उनका प्रेमी भनिएका १६ वर्षीय अनमोल गौलीलाई नियन्त्रणमा लिएर अनुसन्धान थालेको थियो । गौलीको बयान पछि थप तीन जना किशोरलाई पक्राउ गरिएको थियो । केन्द्रीय अनुसन्धान ब्युरो (सीआईबी) सहित नेपाल प्रहरीका चार वटा टोलीले १९ दिन अनुसन्धान गर्नुका साथै अनुसन्धानका क्रममा उच्च प्रविधिको समेत प्रयोग गरिएको बताईएको छ ।
