चैत्र १८ कञ्चनपुर । कञ्चनपुरको लालझाडी गाउँपालिका–शङ्करपुरमा सञ्चालन गरिएको सिकलसेल एनिमिया तथा थालासेमिया निःशुल्क स्क्रिनिङ स्वास्थ्य शिविरमा ५ सय २० जनाको रगत परीक्षण गरिएको छ ।
स्वास्थ्य कार्यालय कञ्चनपुरको आयोजनामा सम्पन्न उक्त शिविरमा ३ सय ९४ जना महिला र १ सय २६ जना पुरुष गरी ५ सय २० जनाको रगत परीक्षण गरिएको हो । परीक्षण गरिएका मध्ये ४१ जनामा ट्रेट (बाहक) देखिएको स्वास्थ्य कार्यालयका फोकल पर्सन सिद्धराज भट्टले जानकारी गराए ।
ट्रेट देखिएका २९ जना महिला र १२ जना पुरुषलाई थप पुष्टि गर्न परीक्षणका लागि प्रादेशिक जनस्वास्थ्य प्रयोगशाला, धनगढी पठाइएको उनले बताए । सिकलसेल एनिमिया र थालासेमिया दुवै वंशाणुगत रगत सम्बन्धी रोग भमएको उनले बताए ।
सिकलसेल एनिमियामा रातो रक्तकोशिकाको आकार हँसिया जस्तो हुने भएकाले शरीरका विभिन्न भागमा रगतको प्रवाह अवरुद्ध हुन सक्ने उनले बताए । यसले अत्यधिक पीडा, रक्तअल्पता, कमजोरी, बारम्बार सङ्क्रमण, छाती दुख्ने, सास फेर्न गाह्रो हुने लगायतका समस्या निम्त्याउन सक्ने बताउदै भट्टले थालासेमिया हेमोग्लो बिनको मात्रा कम हुने रोग भएको बताए ।
जसका बिरामीलाई नियमित रूपमा रगत चढाउनु पर्ने हुन सक्ने बताउदै उनले समयमै उपचार नपाएमा यसले जटिल स्वास्थ्य समस्या निम्त्याउन सक्ने बताए । यी रोग पूर्ण रूपमा निको नहुने भए पनि समयमै पहिचान, परामर्श तथा व्यवस्थापनबाट यसको असर कम गर्न सकिो भट्टले बताए ।
“विशेषगरी ट्रेट भएका व्यक्तिहरूबीच विवाह भएमा सन्तानमा रोग देखिने सम्भावना बढी हुने भएकाले स्क्रिनिङ आवश्यक भएको उनले बताए । समुदायस्तरमै यस्ता वंशाणुगत रोगको पहिचान र नियन्त्रण गर्ने उद्देश्यले शिविर सञ्चालन गरिएको उनले बताए ।
त्यसैगरी लालझाडी गाउँपालिकाको आयोजना तथा च्यारिटी हेल्थ फाउण्डेशन नेपाल र धनगढी नेत्रालयको प्राविधिक सहयोगमा सञ्चालित निःशुल्क आँखा शिविरबाट २ सय ४८ जनाले सेवा लिएका छन् ।
आँखा परीक्षणका क्रममा २८ जनामा मोतिबिन्दु देखिएकाले शल्यक्रियाका लागि रिफर गरिएको छ भने ३८ जनालाई रिडिङ ग्लास वितरण गरिएको छ । ग्रामीण क्षेत्रमा आँखा सम्बन्धी रोगको पहिचान तथा समयमै उपचार सेवा विस्तार गर्ने उद्देश्यले शिविर सञ्चालन गरिएको आयोजकले जनाएको छ ।
