चैत्र १८ धनगढी । सुदूरपश्चिमकै प्रख्यात धार्मिक तथा पर्यटकीय स्थल शिवपुरी उत्तररामेश्वरम् ज्योर्तिलिङ्ग धाममा बिहीबार हनुमान जयन्ती विशेष उत्सवका रूपमा मनाइने भएको छ ।
कैलालीको धनगढी उपमहानगर पालिका वडा नम्बर ४ स्थित धाममा हरेक वर्ष चैत शुक्ल पूर्णिमाका दिन मनाईने हनुमान जयन्ती यस बर्ष पनि विशेष उत्सवका रूपमा मनाइने भएको हो ।
धार्मिक विश्वास अनुसार यही तिथिमा हनुमान को जन्म भएको मानिन्छ । जसका कारण हिन्दू धर्मावलम्बीहरूले यस दिनलाई विशेष रूपमा पूजा–आराधना गरी मनाउने गरेको धामका मूल पुजारी हरिनारायण भट्टले जानकारी गराए ।
उनले हनुमानले आसुरी शक्तिमाथि विजय हासिल गरेको विश्वासले पनि भक्तजनहरूमा गहिरो आस्था रहेको जानकारी गराए ।
उनले पूजा गर्दा रातो कपडा, फूल, चन्दन र चना चढाउने परम्परा रहेको जानकारी गराए । उनले हनुमानको पूजा–आराधनाले शनि दशाको प्रभावसमेत कम हुने धार्मिक मान्यता रहेको बताउँदै यो पूजा फलदायी हुने जानकारी गराए ।
उनले शिवपुरी धाममा हरेक वर्ष झैं यसपटक पनि हनुमान जयन्ती भव्य रूपमा मनाउन तयारी गरिएको जानकारी गराए । आज बिहान ८ बजेदेखि हवन सुरु हुने कार्यक्रम रहेको जानकारी गराए । प्रदेशभरिका भक्तजनहरूलाई पूजा कार्यक्रममा सहभागी हुन मन्दिर व्यवस्थापन समितिले अनुरोध गरेको छ ।
