चैत्र १७ दार्चुला । दार्चुलामा जिप दुर्घटना हुँदा सिँचाइका दुई जना कर्मचारीको मृत्यु भएको छ । दार्चुलाको शैल्यशिखर नगरपालिका वडा नम्बर ४ ओसिलमा जिप दुर्घटना हुँदा दुई जना कर्मचारीको मृत्यु भएको हो ।
त्यसैगरी दुर्घटनामा चार जना घाइते भएका छन्। काँडापारीबाट गोकुलेश्वरतर्फ गइरहेको जिप शैल्यशिखर नगरपालिका वडा नम्बर–४ ओसिल क्षेत्रमा दुर्घटना हुँदा जीपमा सवार दुई जना सरकारी कर्मचारीको घटनास्थलमा मृत्यु भएको प्रहरीले जनाएको हो ।
जिल्ला प्रहरी कार्यालय दार्चुलाका अनुसार दुर्घटनामा परी जलस्रोत तथा सिँचाइ विकास डिभिजन कार्यालय दार्चुलामा कार्यरत इन्जिनियर मनिषा चन्द र सिनियर एसोसिएट अर्गनाइजर भरतबहादुर तितराको घटनास्थलमा मृत्यु भएको हो ।
प्रहरीका अनुसार कामको सिलसिलामा काँडापारीबाट ओसिलतर्फ गइरहेको जीपमा ६ जना सवार रहेका थिए । सिँचाई कार्यालय दार्चुलाले भाडामा प्रयोग गरेको सुप्रप ०१ ००१ ज १६४१ नम्बरको जिप मङ्गलवार बिहान करिब ९ बजेको समयमा दुर्घटना भएको प्रहरीले जनाएको छ ।
े दुर्घटनामा शैल्यशिखर नगरपालिका वडा नम्बर–४ को काँडापारीका जिप चालक २२ वर्षका प्रकाश ठगुन्ना, जिपमा सवार २५ वर्षीय विक्रम महर, ५० वर्षीय अकबर महरा र मालिकार्जुन गाउँपालिका वडा नम्बर–५ डाँडाकोट बस्ने ४५ वर्षीय मिनबहादुर पाल घाइते भएका हुन ।
उनीहरुको गोकुलेश्वर अस्पतालमा उपचार भइरहेको छ भने दुर्घटनाको कारण खुल्न नसकेको बताईएको छ । घटनाबारे थप अनुसन्धान भइरहेको प्रहरीले जनाएको छ ।
