चैत्र १७ कञ्चनपुर । जिल्ला ट्राफिक प्रहरी कार्यालय कञ्चनपुरले सवारी चालक चेकजाँचमा कडाई गरेको छ । कञ्चनपुरका मुख्य राजमार्ग क्षेत्रमा सवारी दुर्घटनाको जोखिम बढ्न नदिन जिल्ला ट्राफिक प्रहरी कार्यालय कञ्चनपुरले सवारी चालक चेकजाँचमा कडाई गरेको हो । लागुपदार्थ र मादक सेवन गरी सवारी चलाउने चालक विरुद्ध ट्राफिक प्रहरीले कडाइ गरेको छ ।
जिल्ला ट्राफिक प्रहरी कार्यालयका प्रमुख प्रहरी निरीक्षक बालेन्द्र नाथले गत कात्तिक देखि हालसम्म लागुपदार्थ सेवन गरेका २२ जना चालकलाई कारबाही गरिएको जानकारी गराए । सोही क्रममा सोमबार पूर्व–पश्चिम महेन्द्र राजमार्गमा गरिएको छड्के जाँचका क्रममा चार जना चालकले लागुपदार्थ सेवन गरी सवारी चलाई रहेको पाईएको नाथले जानकारी गराए ।
स्वास्थ्य कार्यालय र महाकाली अस्पतालको प्राविधिक सहयोगमा गरिएको जाँचमा १६ जना चालकको परीक्षण गर्दा चार जनाले लागुपदार्थ सेवन गरेको पुष्टि भएको प्रहरी निरीक्षक नाथले जानकारी गराए । पक्राउ गरिएका चालकलाई आवश्यक कारबाहीका लागि जिल्ला प्रहरी कार्यालय पठाइएको जानकारी गराउदै उनले लागुपदार्थ सेवन गरी सवारी चलाउनु ट्राफिक नियमको उल्लङ्घन मात्र नभई गम्भीर अपराध र सार्वजनिक सुरक्षामाथिको खेलबाड भएको बताए ।
लापसे जाँचका लागि प्रहरीले ‘ड्रग डिटेक्सन किट’ प्रयोग गर्ने गरेको बताउदै उनले यस प्रविधिमा चालकको ¥यालको नमुना सङ्कलन गरी परीक्षण गरिने बताए । जसबाट चालकले लागुपदार्थ सेवन गरेको वा नगरेको तत्कालै थाहा हुने प्रहरी निरीक्षक नाथले बताए । सेवन गरेको पुष्टि भएमा लागुऔषध ऐन अन्तर्गत मुद्दा दर्ता गरी कारबाही प्रक्रिया अगाडि बढाउने गरिएको उनले बताए ।
यसअघि मादक पदार्थ सेवन (मापसे) को मात्र जाँच हुँदै आएकोमा अहिले चिकित्सकको निगरानीमा लागुपदार्थ सेवन जाँच सुरु गरिएकाले लागुऔषध प्रयोग गरी सवारी चलाउने चालक कानुनी दायरामा आउन थालेको उनले बताए । लागुपदार्थ सेवन गरेका चालकको स्नायु प्रणालीमा असर पर्ने, निर्णय क्षमता कमजोर हुने, प्रतिक्रिया समय ढिलो हुने र दृष्टिमा भ्रम हुने भएकाले दुर्घटनाको जोखिम अत्यधिक रहेको उनले बताए ।
जिल्ला ट्राफिक प्रहरी कार्यालय कञ्चनपुरले राजमार्ग क्षेत्रमा महिनामा लागुपदार्थ सेवनबारे दुई–तीन पटक छड्के जाँच गर्ने र साँझको समयमा दैनिक मापसे जाँचलाई निरन्तरता दिने कार्य गर्दै आएको उनले बताए ।“यसले चालकमा सचेतना बढाउनुका साथै दुर्घटना न्यूनीकरणमा सहयोग पुगेको प्रहरी निरीक्षक नाथले बताए । यस कार्यले कारबाहीसँगै सडक सुरक्षाबारे सचेतना फैलाउने काम पनि हुँदै आएको उनले बताए ।
सडकमा लापसे जाँच गर्नुको मुख्य उद्देश्य दुर्घटना न्यूनीकरण र यात्रुको सुरक्षित यात्रा सुनिश्चित गर्नु रहेको उनले बताए । राजमार्गमा हुने दुर्घटना कम गर्न र लागुऔषध सेवन गरेर सवारी चलाउने प्रवृत्तिलाई निरुत्साहित गर्न आगामी दिनमा पनि लापसे तथा मापसे जाँच अभियानलाई निरन्तरता दिइने उनले बताए ।
