चैत्र १५ कञ्चनपुर । कञ्चनपुरको महाकाली नदीमा निर्माणाधीन चार लेनको पक्की पुलको निर्माण कार्य प्रभावित भएको छ । ‘गाइडबन्ड’ (बाँध) को परिवर्तित ढाँचा स्वीकृत नहुँदा महाकाली नदीमा निर्माणाधीन चार लेनको पक्की पुलको निर्माण कार्य प्रभावित भएको हो ।
दुई वर्षअघि सम्पन्न गर्ने लक्ष्य सहित तीव्र गतिमा अघि बढाइएको आयोजना गत वर्ष आएको बाढीपछि जटिल बन्दै गएको छ । बाढीले पुलको गाइडबन्डमा क्षति पु¥याए पछि पुनः डिजाइन गर्नुपर्ने अवस्था आएका कारण परिवर्तित ढाँचा स्वीकृत हुन नसक्दा निर्माण प्रक्रिया अघि बढ्न नसकेको हो ।
महाकाली पुल आयोजना कार्यालयका प्रमुख नेत्र देवकोटाले पुलको उत्तरतर्फको गाइडबन्ड महाकाली नदीले भत्काए पछि गत जेठ–असार महिनामा नेपाली सेनाले अस्थायी संरचना बनाएर थप क्षति हुनबाट जोगाएको बताए । अहिले स्थायी रूपमा पुनर्निर्माण गर्न ढाँचा परिवर्तन गरिएको भए पनि स्वीकृति नभएकाले काम रोकिएको उनले जानकारी गराए ।
बाढी जोखिम न्यूनीकरणका लागि अघिल्लो सरकारले उक्त क्षेत्रलाई सङ्कटग्रस्त घोषणा गरी तीन महिना सम्म गाइडबन्ड निर्माणको जिम्मा नेपाली सेनालाई दिएको थियो । अब परिवर्तित ढाँचा स्वीकृत भएपछि पुरानै निर्माण कम्पनीलाई निरन्तरता दिने वा नयाँ ठेक्का प्रक्रिया अघि बढाउने विषयमा निर्णय गरिने आयोजना कार्यालयले जनाएको छ ।
ढाँचा स्वीकृतिका लागि सम्बन्धित निकायसँग निरन्तर पहल भइरहेको बताइएको छ । सुरुमा गाइडबन्ड निर्माणका लागि २ सय ५० किलोभन्दा बढी तौलका ढुङ्गा प्रयोग गर्ने योजना भए पनि आवश्यक परिमाणमा ठूला ढुङ्गा उपलब्ध नभए पछि डिजाइन परिवर्तन गरिएको बताइएको छ ।
संशोधित योजना अनुसार पोखरीतर्फ ग्राभेल र नदीतर्फ कटान रोक्न ‘प्लम कङ्क्रिट’ प्रयोग गरिएको निर्माणको जिम्मा पाएको कुमार श्रेष्ठ–सिएफइसी जेभीका इञ्जिनियर किशोर पाण्डेले बताए ।
भेरिएसन अर्डर स्वीकृत नहुँदा काम प्रभावित भएको बताउदै उनले आवश्यक प्रक्रिया अघि बढाउन सम्बन्धित निकायसँग अनुरोध गरिए पनि सुनुवाइ नभएकाले कम्पनीले ठेक्का तोड्ने प्रक्रिया सुरु गरिसकेको बताए ।
समयमै भेरिएसन अर्डर स्वीकृत भई बजेट उपलब्ध भएको भए पुल निर्माण सम्पन्न भइसक्ने उनले बताए । तोकिएको समय भित्र काम सक्ने वातावरण बनाउन आग्रह गर्दा पनि अपेक्षित सहयोग नपाएको उनले बताए ।
पुलको दुवैतर्फ करिब दुई हजार ६ सय मिटर लम्बाइका पोखरीसँगै गाइडबन्ड निर्माण गर्नुपर्ने उनले बताए । तीन अर्ब ६६ करोड रुपैयाँ लागतको उक्त आयोजना विसं २०७४ भदौ दोस्रो साता सुरु गरिएको थियो । पुल क्षेत्रलाई पर्यटकीय स्थलका रूपमा विकास गर्ने उद्देश्यले दुवैतर्फ पोखरी निर्माण गरिएको छ ।
उत्तरतर्फ एक वर्गकिलोमिटर भन्दा ठूला दुई वटा र दक्षिणतर्फ करिब ०.३ वर्गकिला ेमिटरका दुई वटा पोखरी निर्माण भइरहेको बताउदै उनले ढाँचा स्वीकृतिमा ढिलाइ हुँदा गाइडबन्ड तथा पोखरी भित्रका संरचनाको काम रोकिएको बताए ।
हालसम्म आयोजनाको वित्तीय प्रगति ९३.२५ प्रतिशत र भौतिक प्रगति ९५ प्रतिशत पुगेको निर्माण कम्पनीले जनाएको छ ।
