चैत्र १५ बैतडी । बैतडीको पञ्चेश्वर गाउँपालिकाले सुकुमवासीलाई जग्गा दिन नापजाँचको काम सुरु गरेको छ । सुकुमवासी तथा अव्यवस्थित बसोबासीका लागि गाउँपालिकाले भूमि समस्या समाधान अयोगको जिल्ला कार्यालयसँग समन्वय गरेर प्राविधि मार्फत नापजाँचको काम सुरु गरेको हो ।
भूमि समस्या समाधान आयोगले बैतडीका १० वटै पालिकाबाट सुकुमवासी तथा अव्यवस्थित बसोबासीको आवेदन सङ्कलन गरेको आयोगका जिल्ला अध्यक्ष रमेश पाण्डेयले बताए । जिल्लाभरी चार सय सुकुमवासी र दुई हजार सात सय अव्यवस्थित बसोबासीको आवेदन परेको उनले बताए ।
सुकुमवासीलाई जग्गा दिन पञ्चेश्वर गाउँपालिकाबाट काम सुरु गरिएको बताउदै उनले पञ्चेश्वर गाउँपालिकाबाट ५९ सुकुमवासी र चार सय अव्यवस्थित बसोबासी रहेको बताए । पञ्चेश्वर गाउँपालिकाले सङ्कलन गरेका मध्ये छानबिनका क्रममा ५९ सुकुमवासी प्रमाणित भएपछि जग्गा दिन प्राविधिकले नापजाँचको काम सुरु गरेको गाउँपालिका अध्यक्ष गोरख बहादुर चन्दले बताए ।
सुकुमवासीलाई एकै ठाउँमा जग्गा दिन पञ्चेश्वर गाउँपालिका वडा नम्बर–४ को महाकली कोरिडोरसँग जोडिएको जाइबाटामा जग्गा नापजाँचको काम सुरु भएको उनले बताए । स्थानीय भूमि व्यवस्थापन सहजकर्ताका रूपमा काम गर्दै आएका नरीराम लोहारले एकीकृत बस्ती बसाल्न गाउँपालिकाले जाइबाटाको खाली जग्गा पहिचान गरेको बताए ।
एकीकृत बस्ती बसाल्न सके बिजुली, खानेपानी, शिक्षा, स्वास्थ्य जस्ता आधारभूत आवश्यकता पूर्ति गर्न सहज हुने गाउँपालिकाले जनाएको छ । सुकुवासीलाई जग्गा दिन गाउँपालिकाले सहजकर्ता परिचान गरेको छ भने भूमि आयोगले नापीसम्बन्धी काम गर्न प्राविधिक परिचालन गरेको आयोगका जिल्ला अध्यक्ष पाण्डेयले जानकारी गराए ।
उनले पञ्चेश्वर गाउँपालिकाका सुकुमवासीले पाउने जग्गा नापजाँच पछि अन्य पालिकामा काम सुरु गर्ने बताए । सुकुमवासीलाई जग्गा दिन पटक पटक आयोग बने पनि काम सुरु हुन सकेको थिएन । यस पटक जग्गा नापजाँचको काम सुरु हुँदा आशा बढेको सुकुमवासी रगी लुहारले बताए ।
सुकुमवासी २०५२ साल देखि जग्गा पाउने आसामा बसेका थिए । त्यसबेला गठन भएको गोविन्दप्रसाद कलौनी अध्यक्ष रहेको आयोगले बैतडीका २ सय ५० जनालाई लालपुर्जा समेत बाँडेको थियो । उक्त लालपुर्जा अनुसारको जग्गा भने कतै भेटिएको थिएन ।
