चैत्र १५ बाजुरा । बाजुराका महिलाहरुमा आलु खेती प्रति आकर्षण बढ्दै गएको छ । पहिले गाउँ बस्तीमा सडक सञ्जालको पहुँच नहुँदा र उत्पादन भएको आलु बजार सम्म नपुग्दा महिलाहरु आलु खेतीमा कमै लाग्ने गरेको भए पनि अहिले आलु खेती प्रति आकर्षण बढ्दै गएको हो ।
हाल सडक सञ्जाल विस्तार भएपछि, महिलाहरुले उत्पादन गरेको आलु घरकै आगनबाट बिक्री गर्न सक्ने भएका कारण उनीहरुको आलु खेतीमा आकर्षण बढ्दै गएको हो । बुढीगङ्गा नगरपालिका वडा नम्बर–४ साहुवाडाकी अमृता खातीले पहिला गाउँमा सडक नभएको र गाडी पनि नआउने बताउदै अहिले गाडी घरको आगनमै आइरहेको बताईन ।
उत्पादन गरेको आलु सजिलै बजार पठाउन सकिने र आलु खेतीबाट राम्रो आम्दानी भएकाले महिलाहरुको आर्कर्षण बढ्दै गएको बताईन । पहिले गाउँमा धान, गहुँ, जौजस्ता अन्नबाली बढी लगाउने गरिएको बताउदै उनले अहिले आलु खेतीले जिविकोपार्जन सहज भएकाले स्थानीयले अन्नबाली भन्दा बढी आलु खेती गर्न थालेको बताईन ।
बाजुराका हिमाली क्षेत्र, स्वामिकार्तिक खापर, जगनाथ, बुढीनन्दा, बडिमालिका, गौमुल, बुढीगङ्गा, त्रिवेणी र खप्तड छेडेदह लगायतका ठाउँमा आलु राम्रो उत्पादन हुने गरेको कृषि ज्ञान केन्द्र बाजुराले जनाएको छ । बाजुरामा उत्पादन हुने आलु प्रायः स्थानीय जातको हुने र गाई, भैँसी, भेडाबाख्राको मल प्रयोग गरी उब्जाइने भएकाले बाजुरामा आलु खेतीका लागि जमिन उपयुक्त भएको ज्ञान केन्द्रले जानकारी गराएको छ ।
अहिले उत्पादन भएको आलु जिल्ला बाहिरका बजारसम्म पुग्ने गरेको बताइएको छ । उत्पादन हुने आलु लोकल र अर्गानिक भएकाले देशभर माग हुने गरेको किसानले बताएका छन । कृषि ज्ञान केन्द्रले स्थानीय किसानको उत्पादन बजारसम्म पु¥याउन ढुवानी अनुदानको व्यवस्था पनि गर्दै आएको छ ।
विगतका केही वर्षमा बाजुराबाट सयौँ क्विन्टल आलु जिल्ला बाहिर बिक्री भएको छ । करिब एक हजार ९ सय २५ हेक्टर जमिनमा झण्डै २० हजार ४ सय ७० मेट्रिकटन आलु उत्पादन हुने गरेको कृषि ज्ञान केन्द्र बाजुराले जनाएको छ ।
