चैत्र १३ काठमाण्डौ । बालेन्द्र साह नेतृत्वको मन्त्रिपरिषद्मा अर्थमन्त्री बनेका डा. स्वर्णिम वाग्लेले पदभार सम्हाल्दै महत्वपूर्ण निर्णयहरू गरेका छन् ।
उनले राजस्व अनुसन्धान विभाग सहित १५ वटा ऐन खारेज गर्ने प्रक्रिया अघि बढाउने निर्णय गरेका छन् । यससँगै, चैत १३ सम्मको आर्थिक अवस्थाको विस्तृत चित्र प्रस्तुत गर्ने ‘ह्वाइटपेपर’ तयार पार्न कार्यदल गठन गर्ने निर्णय पनि गरिएको छ ।
वाग्लेले रास्वपाको वाचापत्रमा उल्लेखित प्रतिबद्धताहरूलाई कार्यान्वयन गर्न कार्ययोजना बनाउन यस्तो कदम चालिएको बताएका छन् । उच्चस्तरीय आर्थिक सुधार सुझाव आयोगको सिफारिसका आधारमा पुराना तथा अप्रासंगिक कानुनहरूको अध्ययन गरी खारेज गर्ने प्रक्रियामा कार्यदलले काम गर्ने बताईएको छ ।
अर्थमन्त्री वाग्लेले अबको ध्यान बजेट निर्माणमा केन्द्रित हुने बताए । उनले निजी क्षेत्रको सुरक्षा, ठूला आयोजनाहरूलाई गति दिने र लगानीमैत्री वातावरण बनाउने उद्देश्य सहित थप कार्यदलहरू गठन गर्ने तयारी भइरहेको जानकारी दिए ।
हाल अर्थतन्त्रमा केही शिथिलता देखिए पनि सकारात्मक संकेतहरू रहेको उनले बताए । राजस्व संकलन चुनौतीपूर्ण भए पनि बैंकमा निक्षेप वृद्धि भएको बताउदै उनले प्रणालीगत समस्या समाधानमा केन्द्रित भएर अगाडी बढ्ने प्रतिबद्धता जनाए ।
‘अब टुक्राटुक्रा कामले नहुने बताउदै उनले प्रणालीमै सुधार आवश्यक भएको बताए । जनताले दिएको जिम्मेवारीलाई इमानदारीपूर्वक पूरा गर्नुका साथै, उनले प्रणाली सुधारमा केही समय लाग्ने भएकाले धैर्य गर्न पनि आग्रह गरेका छन् ।
