चैत्र १२ बाजुरा । विगत नौ महिना देखि अन्धकारमा रहेका बाजुराको हिमाली गाउँपालिकाका दुर्गम बस्तीहरूमा पुनः बत्ती बलेपछि स्थानीयवासी खुसी भएका छन ।
गत साउन २८ गते राति विच्छ्या खोलामा आएको बाढीपहिरोले लघुजलविद्युत आयोजनाको नहर भत्काए पछि अन्धकार भएका बस्तीहरूमा बत्ती बलेपछि स्थानीयवासी खुसी भएका हुन ।
हिमाली गाउँपालिकाले छिमेकी खत्याड गाउँपालिकासँग समन्वय गर्दै फागुन १ गते देखि असार सम्मका लागि अस्थायी रूपमा विद्युत आपूर्ति गर्ने सम्झौता गरेपछि गाउँबस्तीहरू पुनः उज्याला बन्न थालेका हुन् ।
हिमाली गाउँपालिका वडा नम्बर–६ धुलाचौरका स्थानीय होटल व्यवसायी रामबहादुर रावतले नौ महिना सम्म बत्ती नहुँदा निकै सास्ती खेप्नुपरेको बताए ।
पहिले बत्ती भएकाले अन्य वैकल्पिक व्यवस्था नगरेको बताउदै उनले सोलारबाट मोबाइल चार्ज गरेर काम चलाउँदै आएको बताए । बुधबार बेलुकीदेखि बत्ती सुचारु भएपछि दैनिक जीवन सहज बनेको उनले बताए ।
