चैत्र ०९ बाजुरा । बाजुरामा नवजात शिशु सहित सुत्केरी महिला मृत्यु भएको छ । बडीमालिका नगरपालिका वडा नम्बर–१ सल्लेनाकी २१ वर्षीय सुरता कुमारी रोकाया र उनले जन्म दिएको नवजात शिशुको मृत्यु भएको हो । रोकायाले केही दिनअघि जिल्ला अस्पताल बाजुरामा शिशु जन्माएकी थिईन ।
आमा र शिशुको स्वास्थ्यमा समस्या भएपछि उनलाई थप उपचारका लागि हेलिकप्टर मार्फत प्रादेशिक अस्पताल सुर्खेत पठाइएको थियो । जिल्ला अस्पताल बाजुराका सूचना अधिकारी नृपराज गिरीका अनुसार, “मुटूको रोगबाट पीडित उनको २०७९ सालमा काठमाडौंमा उपचार गरिएकोे थियो ।
डाक्टरले बच्चा जन्माउनु नहुने सुझाव दिएको भए पनि उनले बच्चा जन्माउदा ज्यान गएको हो । आईसियुको राम्रो सुविधा भएको ठाउँमा सुत्केरी गराइएको भए केही सहज हुने बताउदै उनले त्यस्तो सुविधा नभएकाले सुर्खेत लगीएको बताए ।
जिल्ला प्रशासन कार्यालय बाजुराका सहायक प्रमुख जिल्ला अधिकारी लक्ष्मण पुडासैनीले चैत ४ गते उपचारका लागि हेलिकप्टर मार्फत सुर्खेत पठाइएको बताए । उपचारकै क्रममा चैत ५ गते नवजात शिशुको र ७ गते बेलुकी आमाको मृत्यु भएको उनले जानकारी गराए ।
बडीमालिका नगरपालिका उपप्रमुख नन्दा थापाले शव बाजुरामा ल्याउने योजना बनाएको भए पनि परिवार र स्थानीय केही सहयोगीको आग्रहमा आमा र छोराको दाहसंस्कार सुर्खेतमै गरिएको बताईन ।
