चैत्र ०६ धनगढी । यातायात व्यवस्था कार्यालय, धनगढीले चालु आर्थिक वर्ष २०८२–८३ को हाल सम्म ४८ करोड १९ लाख ५१ हजार राजस्व सङ्कलन गरेको छ । यातायात व्यवस्था कार्यालय, धनगढीले विभिन्न शीर्षकबाट ४८ करोड १९ लाख ५१ हजार राजस्व सङ्कलन गरेको हो ।
यातायात व्यवस्था कार्यालयका प्रमुख भुवन जोशीले ४८ करोड १९ लाख ५१ हजार राजस्व सङ्कलन गरेको जानकारी गराउदै सबैभन्दा बढी सवारीसाधनको करबाट ३७ करोड ८३ लाख र सबैभन्दा कम व्यावसायिक रजिष्ट्रेसन दस्तुरबाट १२ लाख राजस्व सङ्कलन भएको जानकारी गराए ।
त्यसैगरी चालक अनुमतिपत्र, सवारी दर्ता किताब सम्बन्धी दस्तुर, लाइसेन्स नवीकरण, जरिवाना, जाँचपास र लाइसेन्स प्रमाणीकरणबाट नौ करोड ३५ लाख ८२ हजार तथा यातायात क्षेत्रको आम्दानी (लगतकट्टा, प्रदूषण, रुट ईजाजत) बाट ८८ लाख २६ हजार राजस्व सङ्कलन भएको उनले जानकारी गराए ।
यातायात व्यवस्था कार्यालयले आर्थिक वर्ष २०८१–८२ मा राजस्वका विभिन्न शीर्षकबाट ७५ करोड ५६ लाख २७ हजार राजस्व सङ्कलन गरेको जानकारी गराउदै उनले कार्यालयको बेरुजु रकम शून्य रहेको बताए ।
