चैत्र ०४ धनगढी । कैलालीको गोदावरी नगरपालिका क्षेत्र भित्रका विद्यालयहरूमा भोली देखि नगर स्तरीय आधारभूत तह (कक्षा ५ र ८) को परीक्षा सुरु हुने भएको छ । शिक्षा शाखा प्रमुख प्रयागराज जोशीले नगर स्तरीय आधारभूत तह (कक्षा ५ र ८) को परीक्षा भोली देखि सुरु हुने जानकारी गराएका हुन । परीक्षा बिहान ८ बजे देखि १० बजेसम्म सञ्चालन हुने जानकारी गराउदै उनले चैत्र १२ गतेसम्म जारी रहने बताए ।
शिक्षा शाखा प्रमुख जोशीले कक्षा ५ मा ५० वटा सामुदायिक र ३२ वटा संस्थागत विद्यालयका २ हजार ६ सय ७१ जना विद्यार्थी परिक्षामा सहभागी हुने जानकारी गराउदै तीमध्ये संस्थागततर्फ १ हजार ५ सय ६८ र सामुदायिकतर्फ १ हजार १ सय ३ विद्यार्थी परिक्षामा सहभागी हुने बताए ।
त्यसैगरी कक्षा ८ मा ३२ वटा सामुदायिक र २९ वटा संस्थागत विद्यालयका ३ हजार १ सय ३९ विद्यार्थीले परीक्षा दिने उनले जानकारी गराए । दुवै तहमा गरी कुल ५ हजार ८ सय १० जना विद्यार्थी परिक्षामा सहभागी हुने उनले बताए । परीक्षा व्यवस्थापनलाई प्रभावकारी बनाउन नगर शिक्षा समिति, परीक्षा सञ्चालन समिति, प्रमुख प्रशासकीय अधिकृत तथा जनप्रतिनिधिहरूबाट अनुगमन गरिने व्यवस्था मिलाइएको उनले बताए ।
परीक्षा सञ्चालनका लागि १४ वटा केन्द्र तोकिएको बताउदै उनले भौगोलिक विकटताका कारण तीन वटा विद्यालयमा गृहकेन्द्र व्यवस्था गरिएको बताए । गृहकेन्द्रमा केन्द्राध्यक्ष र निरीक्षक बाहिरबाट खटाइने जानकारी गराउदै उनले प्रत्येक २६ जना विद्यार्थी बराबर एक जना निरीक्षकको व्यवस्था गरिएको बताए ।
परीक्षासँग सम्बन्धित सम्पूर्ण तयारी पूरा भइसकेको र नतिजा प्रकाशन तथा ग्रेड वृद्धी परीक्षाको व्यवस्थापन पनि गरिने उनले जानकारी गराए । स्थानीय सरकार सञ्चालन ऐन २०७४ अनुसार आधारभूत तहको परीक्षा सञ्चालनको जिम्मेवारी स्थानीय तहलाई दिइएको उनले बताए ।
