फागुन २७ धनगढी । कृषि तथा पशुपन्छी विकासमन्त्री डा. मदनप्रसाद परियारले यस वर्ष मुलुकमा मलखादको अभाव नहुने बताएका छन् । बुधबार कैलालीमा चारपाङ्ग्रे मेसिनद्वारा धान रोपाइँको उद्घाटन गर्दै मन्त्री डा. परियारले मलखादको अभाव नहुने बताएका हुन् । “मलखादको अभाव हुन नदिन सरकारले समयमै २९ अर्ब रुपैयाँ अनुदान निकासा गरिसकेको बताउदै मन्त्री डा. परियारले अन्तर्राष्ट्रिय परिवेशले असर नपारे यस वर्ष मलको अभाव नहुँने बताए ।
साथै प्राङ्गारिक मलको प्रयोगका लागि पनि तयारी अवस्थामा रहनु पर्ने बताउदै उनले मेसिनको प्रयोगले श्रमशक्ति र लागत घटाउने भएकाले कृषि यान्त्रिकीकरणले यस क्षेत्रलाई नयाँ दिशा दिने बताए । प्रधानमन्त्री कृषि आधुनिकीकरण परियोजना, परियोजना कार्यान्वयन एकाइ कैलालीको आयोजनामा जानकी गाउँपालिका वडा नम्बर–४, कञ्चनपुरमा मेसिनद्वारा चैते धान रोपाइँ कार्यक्रम गरिएको हो ।
एकाइले कैलालीमा पहिलो पटक चैते धान रोपाइँका लागि मेसिन भित्र्याएको हो । बीजबृद्धि कृषि सहकारी संस्थाको दुई बिघा जमिनमा मेसिनबाट चैते धान लगाइएको छ । परियोजना कार्यान्वयन एकाइ कैलालीका कृषि अधिकृत भीष्मराज रेग्मीले यस पटक बर्दियामा रहेको मेसिनबाट धान रोपाइँ गरिएको र सहकारीलाई १६ लाख ५० हजार रुपैयाँ मूल्य पर्ने मेसिन खरिद गरेर दिने तयारी भइरहेको जानकारी गराए ।
धान रोपाइँ तथा अन्तरनिकाय अनुगमन कार्यक्रममा सुदूरपश्चिम प्रदेश सरकारका भूमि व्यवस्था, कृषि तथा सहकारीमन्त्री वीरबहादुर थापा, जिल्ला समन्वय समितिका प्रमुख टीकाकुमारी भुल, भजनी नगरपालिकाका प्रमुख केवल चौधरी र जानकी गाउँपालिकाका अध्यक्ष गणेश चौधरी लगायतका जनप्रतिनिधिको उपस्थिति रहेको थियो ।
