फागुन २७ सुर्खेत । सुर्खेतको वीरेन्द्रनगर नगरपालिका वडा नम्बर—४ को जनजागरण सामुदायिक वनमा मृत्यु भएकी १६ वर्षीया इनिसा विक मृत्यु प्रकरणमा निष्पक्ष छानबिनको माग गर्दै पीडित पक्षले आन्दोलन गरेका छन् । बुधबार वीरेन्द्रनगरमा ‘बालिकामाथि हुने बलात्कार, हत्या र हिंसा बन्द गर’ जस्ता नारासहित उनीहरुले दबाबमूलक आन्दोलन गरेका हुन् ।
प्रहरीले घटनामा संलग्न चार जना नाबालक किशोरहरूलाई यस अघि नै पक्राउ गरेर अनुसन्धान गरिरहेको जनाएको छ ।
गुर्भाकोट नगरपालिका वडा नम्बर–६ बडाखोली स्थायी घर भई हाल वीरेन्द्रनगर नगरपालिका वडा नम्बर–१ मा बस्दै आएकी १६ वर्षीय इनिसा शनिबार बिहान ट्युसन पढ्न जाने भन्दै घरबाट निस्किएकी थिइन् ।
बिहान ९ बजेतिर वीरेन्द्रनगर बजारको उत्तरतर्फ पर्ने जनजागरण सामुदायिक वनमा उनी अचेत अवस्थामा भेटिएकी थिइन् । प्रहरीले उनलाई प्रदेश अस्पताल पु¥याउँदा चिकित्सकले मृत घोषणा गरेका थिए । सोही दिन प्रहरीले १६ वर्षीय बालकलाई नियन्त्रणमा लिएको थियो ।
पीडित पक्षले फागुन २४ गते उजुरी दिएका थिए । सोही उजुरीका आधारमा अन्य १५, १६ र १७ वर्षीय बालकहरूलाई पनि नियन्त्रणमा लिएर अनुसन्धान भइरहेको जिल्ला प्रहरी कार्यालय सुर्खेतका प्रहरी नायव उपरीक्षक मोहनजंग बुढ्थापाले
बताए । मृतक बालिका वीरेन्द्रनगरको उषा बालबाटिकामा कक्षा ११ मा अध्ययनरत थिइन् । प्रहरीलाई आफन्तहरूले भने अनुसार इनिसा २३ गते शनिबार बिहान ट्युसन पढ्न जाने भन्दै घरबाट निस्किएकी थिइन् ।
उनी पढ्ने विद्यालय र इनिसा बेहोस अवस्थामा भेटिएको स्थान निकै टाढा छ । स्कुलभन्दा उत्तरतर्फ करिब १० किलोमिटर दुरीमा पर्ने उक्त जङ्गलमा इनिसा रक्ताम्मे अवस्थामा भेटिएकी थिइन् । ट्युसन पढ्न भन्दै बिहान ६ बजेतिरै घरबाट निस्किएकी ती किशोरी जङ्गलसम्म पुग्नुका पछाडि ती १६ वर्षीया युवकसँग प्रेम सम्बन्ध भएर हो कि भन्ने आशङ्का प्रहरीले गरेको छ ।
ती युवकले पनि अनुसन्धानका क्रममा प्रेम सम्बन्ध रहेको खुलाएको एक अनुसन्धान अधिकृतले बताएका छन् । ‘घर परिवारले ट्युसन पढ्न गएको भनिए पनि पक्राउ गरिएका १६ वर्षीय किशोरले मर्निङ वाक गर्न गएको बताएको अनुसन्धान अधिकृतले जानकारी गराएका छन ।
मर्निङ वाक जाने बहानामा उनीहरुले जबरजस्ती करणी गरी हत्या गरेको आशङ्का प्रहरीले गरेको छ । यद्यपि घटनाबारे अनुसन्धान भइरहेको र पोस्टमार्टम रिपोर्ट आउन बाँकी नै छ । मृतकका आफन्तहरूले सामूहिक बलात्कार पछि हत्या भएको भन्दै दोषीहरूलाई कारबाहीको माग गरेका छन् । शवको पोस्टमार्टम प्रदेश अस्पताल सुर्खेतमा भए पनि सद्गत भने गरिएको छैन ।
