फागुन १० कञ्चनपुर । कञ्चनपुरको मणिका धाम (मुडका) मा फागुन १३ र १४ गते परम्परागत मेला लाग्ने भएको छ । शुक्लाफाँटा नगरपालिका वडा नम्बर–८ स्थित धार्मिक तथा पर्यटकीय क्षेत्र मणिका धाम्मा यही फागुन १३ र १४ गते परम्परागत मेला लाग्ने भएको हो ।
वैजनाथ धार्मिक तथा पर्यटकीय विकास समितिका अनुसार मेला व्यवस्थित र सुरक्षित बनाउन मन्दिर परिसरमा सरसफाइ, सडक मर्मत तथा व्यवस्थापनका काम सम्पन्न भएका छन् । मन्दिर भन्दा तल्लो क्षेत्रमा व्यापारिक प्रयोजनका लागि पसल राख्न मैदान सम्याउने, झाडी सफा गर्ने र आवश्यक संरचना मिलाउने कार्य सकिएको समितिले जनाएको छ ।
दर्शनार्थीको सहज आवागमनका लागि सवारीसाधन पार्किङस्थल निर्धारण गरिएको समितिका अध्यक्ष पुरन हमालले जानकारी गराए । मन्दिर परिसर र आसपास क्षेत्र दर्शनार्थीका लागि छुट्याइएको बताउदै उनले मेला क्षेत्रमा मदिरा पूर्ण रूपमा निषेध गरिएको बताए । सवारी आवत जावतका लागि सडक मर्मत कार्य अघि बढाइएको र खानेपानीको उचित प्रबन्ध मिलाइएको उनले जानकारी गराएका छन ।
शान्ति सुरक्षालाई प्राथमिकता दिँदै नेपाल प्रहरी र सशस्त्र प्रहरीसँग समन्वय गरिएको र मेला अवधिभर सुरक्षा व्यवस्था कडा पारिने उनले जानकारी गराए । समितिका कोषाध्यक्ष डम्बरबहादुर ऐरले ज्येष्ठ नागरिक, अपाङ्गता भएका व्यक्ति र महिलालाई दर्शनमा प्राथमिकता दिने निर्णय गरिएको बताए ।
हरेक वर्ष फागुन शुक्ल पक्षको नवमीको राति र दशमीको दिन दिउँसो मुडकामा मेला लाग्ने परम्परा रहेको उनले जानकारी गराए । मेलाका अवसरमा स्थानीय सरकारले सार्वजनिक बिदा दिने गरेको उनले बताए । धार्मिक तथा पर्यटकीय दृष्टिले महत्त्वपूर्ण गन्तव्य मानिने मुडकामा बैजनाथ बाबाको दर्शन गरेमा इच्छित फल प्राप्त हुने जनविश्वास रहेको बताउदै उनले जसका कारण नेपाल र भारतका हजारौँ दर्शनार्थी सहभागी हुने गरेको बताए ।
मुडका क्षेत्रमा सिद्धबाबाको प्राचीन मन्दिर र नजिकै तलाउ रहेको उनले बताए । मन्दिर परिसर नजिकै करिब दुई करोड रुपैयाँभन्दा बढीको लागतमा आधुनिक शैलीको भजनघर निर्माण गरिएको जानकारी गराउदै उनले पहिलोपटक मन्दिर क्षेत्रमा विद्युत् सेवा विस्तार गरिएको बताए ।
पूर्व–पश्चिम राजमार्गबाट करिब ११ किलोमिटर उत्तर चुरेको फेदीमा अवस्थित उक्त क्षेत्र प्राचीनकाल देखि पहाडी भेगबाट चौपाया सहित हिउँदमा बसाइँ सर्नेहरूको आश्रयस्थलका रूपमा परिचित रहेको उनले जानकारी गराए ।
