फागुन ०५ धनगढी । नेपाल कम्युनिष्ट पार्टी (बहुमत) सुदूरपश्चिम प्रदेशमा आह्वान गरेको बन्दको सामान्य प्रभाव परेको छ । धनगढीका अधिकांश निजी विद्यालयले पठन पाठन स्थगित गरेका भए पनि सडकमा सवारी साधन सञ्चालन निर्बाध रुपमा भएकाले बन्दको सामान्य प्रभाव परेको ।
विद्यालयहरूले विद्यार्थी, शिक्षक तथा कर्मचारीको सुरक्षालाई मध्यनजर गर्दै विद्यालय बन्द गरेका थिए । धनगढीको सुदूरपश्चिमाञ्चल एकेडेमीले सूचना जारी गर्दै उत्पन्न परिस्थितिलाई मध्यजर गर्दै एक दिनका लागि पठन पाठन स्थगित गरेको जनाएको थियो ।
त्यसैगरी एश्वर्या विद्या निकेतनले पनि विद्यालय बन्द भएको जानकारी गराएको थियो । ग्यालेक्सी बोर्डिङ, एलाइन्स, स्टिफन, इ–चाइल्ड लगायत अधिकांश विद्यालय मंगलबार बन्द रहेका थिए । केही विद्यालयले मंगलबार विद्यालयमा पुगिसकेका विद्यार्थीलाई पनि बन्द भन्दै फर्काएका थिए ।
निजी विद्यालयहरुले असुरक्षाको कारण देखाए पनि धनगढीका केही सामुदायिक विद्यालय भने सञ्चालन भएका थिए । धनगढीको त्रिनगर माध्यामिक विद्यालयले नियमित कक्षा संचालन गरेको जनाएको छ । यातायात क्षेत्रमा भने बन्दको प्रभाव नपरेको प्रहरीले जनाएको छ ।
छोटो तथा लामो दूरीका सवारी साधन नियमित रूपमा सञ्चालनमा रहेको प्रदेश प्रहरी कार्यालय धनगढीले जनाएको छ । कार्यालयका प्रहरी वरिष्ठ उपरीक्षक तथा प्रवक्ता पदम बिष्टले् कुनै अप्रिय घटना नघटेको बताए ।
बन्दकर्ताहरूले फागुन २१ को निर्वाचन खारेज गर्न, वैदेशिक उत्पीडन र हस्तक्षेप विरुद्ध संघर्ष गर्न, राष्ट्रिय स्वाधीनताको रक्षा गर्न तथा संवैधानिक संयुक्त सरकार गठनको मार्ग अघि बढाउनु पर्ने माग राख्दै बन्दको घोषणा गरेका थिए ।
