फागुन ०५ धनगढी । कैलालीको कैलारी गाउँपालिका वडा नम्बर–१ स्थित हुलाकी सडक खण्डमा मंगलबार दिउँसो भएको सवारी दुर्घटनामा एक जना महिलाको मृत्यु भएको छ भने तीन जना घाइते भएका छन् ।
जिल्ला प्रहरी कार्यालय कैलालीका अनुसार दिउँसो करिब ३ बजेतिर कैलारी गाउँपालिका वडा नम्बर–१ हुलाकी रोडमा विपरीत दिशाबाट आइरहेको स्कारपियो गाडी र मोटरसाइकल एक आपसमा ठोक्किँदा भएको दुर्घटनामा एक जना महिलाको मृत्यु भएकोे हो भने तीन जना घाइते भएका भएका हुन ।
दुर्घटनामा गम्भीर घाइते भएकी मोटरसाइकल चालक कैलारी गाउँपालिका वडा नम्बर–५ बस्ने अन्दाजी ३०–३५ वर्षीया ईप्सा चौधरीको उपचारका क्रममा नवजिवन अस्पतालमा मृत्यु भएको प्रहरीले जनाएको छ ।
प्रहरीका अनुसार कैलारी गाउँपालिका वडा नम्बर–७ का वडा अध्यक्ष दिपेन्द्र बमले चलाएको भे १ च ४२७५ नम्बरको महेन्द्रा कोरेक्स (स्कारपियो) र से ५ प २७८२ नम्बरको मोटरसाइकल एक आपसमा ठोक्किँदा दुर्घटना भएको हो । स्कारपियोमा सवार कैलारी गाउँपालीका वडा नम्बर–७ का ५० वर्षीय तारा चौधरी गम्भीर घाइते भएका छन् ।
उनको नवजिवन अस्पतालमा उपचार भइरहेको छ । त्यसैगरी सोही गाडीमा सवार ३४ वर्षीय बलिराम चौधरीको शरीर तथा बायाँ हातमा चोट लागेको छ भने ३१ वर्षीय कमलेस चौधरीको बायाँ खुट्टामा चोट लागेको प्रहरीले जनाएको छ । बलिरामको अवस्था मध्यम र कमलेसको अवस्था सामान्य रहेको बताइएको छ ।
दुर्घटनामा संलग्न गाडी चालक तथा वडा अध्यक्ष बमको मुखमा सामान्य चोट लागेको बताइएको छ । प्राथमिक उपचारपछि उनलाई जिल्ला प्रहरी कार्यालय कैलालीले नियन्त्रणमा लिएको छ ।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक योगेन्द्र तिमिल्सिनाले घटनाबारे थप अनुसन्धान भइरहेको जानकारी गराएका छन् । दुर्घटनाको कारण खुल्न बाँकी रहेको प्रहरीले जनाएको छ ।
