फागुन ०४ बैतडी । बैतडीमा इजाजत प्राप्त ४ सय ७ थान भरुवा बन्दुक बुझाईएको छ । आसन्न फागुन २१ गते हुने प्रतिनिधि सभा निर्वाचनमा सुरक्षालाई मध्यनजर गर्दै स्थानिय प्रशासन कार्यालयको आग्रह बमोजिम ४ सय ७ थान भरुवा बन्दुक बुझाईएको हो ।
जिल्ला प्रशासन कार्यालय बैतडीले निर्वाचनको सुरक्षालाई लक्षित गर्दै गत माघ मसान्तसम्म इजाजत प्राप्त हातहतियार बुझाउन आग्रह गरेको थियो । आग्रह बमोजिम हालसम्म ४ सय ७ थान भरुवा बन्दुक बुझाईएको जिल्ला प्रहरी कार्यालय बैतडीका प्रवक्ता, प्रहरी निरीक्षक सुरज सिंहले जानकारी गराए ।
निर्वाचनलाई स्वच्छ, निष्पक्ष, भयरहित र शान्तिपूर्ण रूपमा सम्पन्न गर्न विभिन्न व्यक्तिका नाममा रहेका इजाजत प्राप्त हातहतियार बुझाउन आग्रह गरिएको प्रहरी निरीक्षक सिंहले बताए । इजाजत प्राप्त बन्दुक नजिकको प्रहरी कार्यालयमा बुझाउन सकिने उनले बताए ।
कसैले सूचना प्राप्त नगरेको भएमा अझै पनि इजाजत प्राप्त हातहतियार बुझाउन सकिने प्रहरी निरीक्षक सिंहले बताए । जिल्ला प्रशासन कार्यालयको अभिलेख अनुसार बैतडीमा १ हजार ८६ थान इजाजत प्राप्त हातहतियार रहेका छन् । ती मध्ये आधा भन्दा कममात्रै हतियार प्रहरीमा बुझाइएको छ ।
निर्वाचन सुरक्षाका लागि हातहतियार बुझाउन आग्रह गरिएको र हतियार नबुझाउनेलाई कानुन अनुसार कारवाही हुने प्रहरीले जनाएको छ । बुझाइएका इजाजत प्राप्त सबै प्रकारका हातहतियार र गोलीगठ्ठा चैत २० गतेपछि सम्बन्धित व्यक्तिलाई फिर्ता गरिने जिल्ला प्रशासन कार्यालय बैतडीले जानकारी गराएको छ ।
