फागुन ०१ दार्चुला । दार्चुलाको शैल्यशिखर नगरपालिका वडा नम्बर–८ देबलमा ७१ वर्षीया लक्ष्मी जोशीको हत्या घटनामा प्रहरीले २ जनालाई पक्राउ गरेको छ । सोमबार राति घरमै मृत फेला परेकी जोशीको हत्या गरेर गरगहना लुटपाट गरेको अभियोगमा प्रहरीले दुई जनालाई पक्राउ गरेको हो ।
शैल्यशिखर नगरपालिका वडा नम्बर–८ कै अन्दाजी २३ वर्षीय उमेश साउद र बैतडी घर भएका २३ वर्षकै गोपाल नाथलाई पक्राउ गरिएको सुदूरपश्चिम प्रदेश प्रहरी कार्यालयले जानकारी गराएको हो ।
प्रदेश प्रहरी कार्यालयका प्रमुख प्रहरी नायब महानिरीक्षक (डीआईजी) ओमबहादुर रानाले पक्राउ गरिएका साउद ट्याक्टर चालक भएको जानकारी गराउदै नाथले उनको सहयोगीका रूपमा काम गर्ने गरेको बताए । मृतक जोशीका छिमेकी समेत रहेका ट्याक्टर चालक साउदकै योजनामा जोशीको हत्या गरी गरगहना लुटपाट गरिएको पाइएको उनले जानकारी गराए ।
प्रहरी नायब महानिरीक्षक रानाले उनीहरूले जोशीको हत्यापछि लुटपाट गरेका गरगहना समेत बरामद गरिएको जानकारी गराए । झन्डै दुई तोला बराबरका गरगहना बरामद गरिएको जानकारी गराउदै उनले उनीहरू मध्ये साउद चोरी मुद्दामा ११ महिना जेल सजाय भुक्तान गरेर छुटेका व्यक्ति भएको बताए ।
नाथले पनि चार महिना कैद सजाय भोगे सकेको उनले जानकारी गराए । उनीहरू लागूऔषध दुव्र्यशनीमा समेत संलग्न रहेको खुलेको प्रहरीले जनाएको छ । बयानका क्रममा दुवै जनाले अभियोग स्वीकार गरेको प्रहरीले बताएको छ । घटनाबारे विस्तृत अनुसन्धान जारी रहेको बताईएको छ । संघीय प्रहरी कार्यालय महेन्द्रनगरबाट प्रहरी नायब निरीक्षक पदमबहादुर थापाको नेतृत्वमा खटिएको टोलीले घटनाको सफल अनुसन्धान गरेको बताईएको छ ।
