फागुन ०१ धनगढी । आसन्न प्रतिनिधि सभा सदस्यको निर्वाचनको चहलपहल बढेसंगै स्थानीय स्तरमा आर्थिक गतिविधि पनि बढेको छ । चुनावका कारण चिया पसल देखि छपाइ–प्रिन्टिङ पसल, आयल स्टोर, होटल लगायतमा आर्थिक गतिविधि बढेको हो । चियाको पीउदै चुनावी छलफल देखि लिएर होटलमा खाजा, खाना खानेहरूको सङ्ख्या बढेको छ । त्यसैगरी, उम्मेदवार र दलका कार्यकर्ताहरू चुनावी प्रचार प्रसारमा जुटेपछि इन्धनको उपभोग पनि बढेको छ ।
कैलाली उद्योग वाणिज्य सङ्घका अध्यक्ष पुष्कर ओझाले आसन्न चुनावले व्यापार, व्यवसायमा सकारात्मक प्रभाव पारिरहेको बताए । उनले विभिन्न परिस्थिति, आन्दोलनका कारण शिथिल बनेको व्यापार, व्यवसाय चुनावको बेला गतिशील बनेको बताउदै यसले समग्र अर्थतन्त्र चलायमान बनेको बताए । अहिले व्यापार,व्यवसाय बढिरहेको बताउदै उनले कोरोना महामारीले देशकै अर्थतन्त्र तहसनहस भएको बताए ।
कोरोना समस्या हटेलगत्तै सुदूरपश्चिम प्रदेशको अस्थायी राजधानी धनगढीको मुख्य सडक निर्माणका लागि भएको तोडफोड र त्यसपछि निर्माणाधीन अवस्थाका कारण व्यापार, व्यवसाय थला परेको उनले बताए । चुुनावी सरगर्मीले धेरै हदसम्म व्यापार व्यवसाय बढाएको अध्यक्ष ओझाले बताए । त्यसैगरी, धनगढीमा होटल व्यवसाय गरिरहेका दहिटान घरका सञ्चालक विरेन्द्र चौधरीले पनि यस बेला व्यापार बढेको बताएका छन । चुनाव वा के कारणले हो थाहा नभएको बताउदै उनले अहिले व्यापार बढेको बताए । चुनावका बेला राजनीतिक दल र विशेषगरी उम्मेदवारले खर्च गर्ने गरेको स्थानीयले बताएका छन ।
प्रतिनिधिसभा सदस्य निर्वाचनको सरगर्मी बढ्दै गएको बेला मतदाताले पनि चुनावी चर्चा गर्न थालेका छन् । बिहान–साँझ चिया पसल, होटलमा जमघट भएर उनीहरुले पनि चुनावी चर्चा गर्न थालेका हुन् । चिया पीउदैै मतदाताबाट जितहारको आँकलनसंगै राजनीतिक दलहरूले विगतमा गरेका बाँचा पनि उनीहरूले सम्झन थालेका छन् ।
सुदूरपश्चिम प्रदेशको अस्थायी राजधानी रहेको कैलाली निर्वाचन क्षेत्र नम्बर ५ जुनसुकै चुनावको बेला पनि चर्चामा रहँदै आएको छ । यसपटक सबै दलहरुले नयाँ अनुहारका उम्मेदवार बनाए पछि चिया पसल, होटलमा जघमघट हुने र जितहारको विषयमा अडकलबाजी हुने गरेको छ । धनगढी उपमहानगरपालिका वडा नम्बर–८ स्थित धनगढी गाउँका भवानीदत्त भट्टले दलहरुले विगतमा गरेका प्रतिबद्धता कतिपय पूरा भए पनि जनताको अपेक्षानुसार काम नभएको बताए ।
उनले यो क्षेत्रमा नेपाली कांग्रेस, नेकपा एमाले, नेपाली कम्युनिस्ट पार्टी र स्वतन्त्र उम्मेदवार प्यारेलाल रानाबिच मुख्य प्रतिस्पर्धा हुने बताए ।“जित्ने नजित्ने पछिको कुरा हो, तर स्वतन्त्र उम्मेदवार राना पनि बलियो उम्मेदवार छन” उनले भने । “मलाई लाग्छ, उनी सहित चार दलबिच मुख्य प्रतिस्पर्धा हुन्छ ।” नेपाली कांग्रेसबाट नरनारायण शाह मनु, एमालेबाट यज्ञराज ढुङ्गाना, नेपाली कम्युनिस्ट पार्टीबाट प्रेमबहादुर आले र रास्वपाबाट आनन्दबहादुर चन्द उम्मेदवार बनेका छन् ।
सबै उम्मेदवार जनतामाझ लोकप्रिय देखिएकाले कसले बाजी मार्ने भन्ने सवालमा अहिले केही भन्न नसकिने स्थानीय सन्तराम रानाले बताए । स्थानीय नेता समेत रहेका शिवराज रानाले भने कांग्रेसका शाह र स्वतन्त्र उम्मेदवार रानाबिच कुनै समुदाय विशेषको मत भागवण्डा भएमा फाइदा एमालेका ढुङ्गानालाई हुने बताएका छन ।
