फागुन ०१ दार्चुला । दार्चुलाको नौगाड गाउँपालिका वडा नम्बर–१ को नागु क्षेत्रमा सरकारले खाद्यान्न ढुवानी सुरु गरेको छ । स्थानीयले आफ्ना माग सम्बोधन नभए निर्वाचन बहिष्कार गर्ने चेतावनी दिए पछि सरकारले नागु क्षेत्रमा खाद्यान्न ढुवानी सुरु गरेको हो ।
स्थानीयवासीले माघ १ र १७ गते भेलागरी खाद्यान्न, सडक, विद्यालय, झोलुङ्गे पुल लगायत पूर्वाधार विकासका माग राखेका थिए । त्यसलगत्तै माघ १८ गते जिल्ला समन्वय समिति प्रमुख महादेव बडु नेतृत्वको जिल्ला खाद्य व्यवस्था समितिको बैठकले नागु क्षेत्रमा खाद्यान्न ढुवानी गर्ने निर्णय गरेको थियो ।
सोही निर्णय अनुसार हाल नागु क्षेत्रमा खाद्यान्न ढुवानी भइरहेको खाद्य व्यवस्था तथा व्यापार कम्पनी शाखा कार्यालय दार्चुलाका प्रमुख हर्कराज उपाध्यायले जानकारी गराए । उक्त क्षेत्रमा पहिलो चरणमा ३३ बोरा चामल पठाइएको उनले बताए ।
उपाध्यायले वडा नम्बरं १ को लागि एक हजार क्विन्टल खाद्यान्न ढुवानी सुरु गरिएको बताए । सिके कन्सटक्र्सन मार्फत उक्त क्षेत्रमा खाद्यान्न ढुवानी सुरु गरिएको बताउदै उनले नागु, पारिमेला र इयरकोट क्षेत्रमा वितरण हुने गरी कम्पनीले चामल पठाइरहेको बताए ।
खाद्य संस्थानले प्रतिकिलो ६२ रुपैयाका दरले मोटो चामल उपलब्ध गराइरहेको उनले जानकारी गराए । चामल प्रतिबोरा एक हजार ५ सय ५० रुपैया तोकिएको उनले बताए । वडा नम्बरं १ का वडाध्यक्ष हरिलाल महताले अहिले गाउँमा निरन्तर खाद्यान्न ढुवानीको काम भइरहेको बताए ।
अहिले नौगाड गाउँपालीका वडा नम्बर–१ को सुण्डमुण्ड सम्म जीप तथा ट्याक्टर मार्फत खाद्यान्न ढुवानी भइरहेको उनले बताए । पारिमेलाबाट खच्चडले गाउँका पसलमा खाद्यान्न पु¥याउने काम गरिरहेको महताले जानकारी गराए । यसअघि दार्चुलाका अन्य खाद्य डिपोमा चामल ढुवानी भए पनि नागुको लागि ढुवानी भएको थिएन् ।
खाद्य व्यवस्था तथा व्यापार कम्पनीले चालु आर्थिक वर्षमा चामल ढुवानीका लागि दुई पटक बोलपत्र आह्वान गरे पनि नागु डिपोका लागि न्यून ढुवानी भाँडा निर्धारण गरिएकाले कुनै पनि ढुवानीकर्ताले प्रस्ताव पेश नगरेपछि समयमा खाद्यान्न पठाउन नसकिएको प्रमुख उपाध्यायले बताए । कम्पनीले नागुका लागि प्रतिक्विन्टल दुई हजार १ सय रुपैया ढुवानी भाडा तोकेर बोलपत्र निकालेको थियो ।
गत कात्तिकमा दोस्रो पटक बोलपत्र आह्वान गर्दा पनि प्रस्ताव दर्ता नभए पछि ढुवानी रोकिएको थियो । सडक पहुँच नभएकाले खच्चड र मानिसबाट खाद्यान्न ढुवानी गर्दा महँगो मूल्य पर्न गएपछि ठेकेदारले यो क्षेत्रका लागि ठेक्कामा सहभागी नभएका गाउँपालिका अध्यक्ष दलजीत सिंह धामीले बताए । ठेकेदारले अघिल्लो वर्ष ढुवानीमा नोक्सान भएको भन्दै यस पटक अस्वीकार गरेको उनले बताए ।
नागु क्षेत्र नौगाडकै सबैभन्दा टाढाको दुर्गम बस्ती भएको बताउदै उनले सरकारी तवरबाट यस क्षेत्रमा अहिले खाद्यान्य ढुवानी गरिएको चामल बजारको तुलनामा महँगो भएको भन्दै स्थानीयले आपत्ति जनाएको बताए । स्थानीय करनसिंह डडाँलले बजारमा प्रतिकिलो ५८ रुपैयामा चामल पाइने भए पनि खाद्य कम्पनीको चामल ६२ रुपैयामा बिक्री गरिरहेको बताए ।
यही साता प्रमुख जिल्ला अधिकारी अनिल पौडेल नेतृत्वको टोली नागु पुग्दा खाद्य संस्थानको चामलको मूल्यमा हेरफेरका लागि स्थानीयले आग्रह गरेको डडालले जानकारी गराए । सरकारले सहुलियत मूल्यमा चामल उपलब्ध गराउनु पर्नेमा व्यापारिक चामल भन्दा महँगो हुँदा समस्या पर्ने भन्दै मूल्य समायोजनको लागि ध्यानाकर्षण गराएको उनले बताए ।
