माघ २८ दार्चुला । दार्चुलाको महाकाली नगरपालिका वडा नम्बर–४ मा प्रहरी हवल्दार योगेन्द्र घर्तीको हत्या प्रकरणका मुख्य आरोपी आशिष पाललाई प्रहरीले पक्राउ गरेको छ । जिल्ला प्रहरी कार्यालयको टोलीले पाललाई दुहुँ गाउँपालिकाको हिकिलाबाट बुधबार दिउँसो पक्राउ गरेको हो ।
प्रदेश प्रहरी कार्यालय धनगढीले उनलाई पक्राउ गरेको जानकारी गराएको हो । प्रदेश प्रहरी कार्यालयका प्रवक्ता वरिष्ठ उपरीक्षक पदमबहादुर विष्टले हिकिलाबाट पाललाई पक्राउ गरिएको जानकारी गराएका हुन ।
महाकाली नगरपालिका वडा नम्बर–४ को बाङ्गाबगरमा पालले सञ्चालन गरेको अस्मिता बियर बारमा प्रहरी हवल्दार घर्तीको हत्या गरिएको थियो । प्रहरीका अनुसार पालकी कान्छि श्रीमती दिपिकालाई घर्तीले जिस्काएको निहुँमा उनको कुटपिट गरी हत्या गरिएको खुलेको छ ।
यसअघि दार्चुला प्रहरीले यस घटनामा संलग्न रहेको आरोपमा पालकी कान्छी श्रीमती दिपिका पाल, २१ वर्षीया पायल लुहार, सुरेन्द्र बम र राजेन्द्र डडाललाई पक्राउ गरिसकेको छ ।
घटनामा फरार रहेकी पालकी जेठी श्रीमती लक्ष्मी बडु र भाइ मनिस पालको खोजी भइरहेको प्रहरीले जनाएको छ । हत्या गरिएका घर्तीको बुधबार महाकाली नदीमा अन्त्येष्टि गरिएको छ ।
