माघ २८ धनगढी । नेपाली कम्युनिस्ट पार्टी (नेकपा)ले सुदूरपश्चिम प्रदेश सरकारका मुख्य मन्त्री कमल बहादुर शाहलाई राजीनामा दिन सुझाव दिएको छ । वर्तमान सरकार प्रदेश राजधानी कार्यान्वयनमा पूर्ण असफल भएको, आवश्यक कानुन निर्माण गर्न नसकेको, बजेट कार्यान्वयनमा असफल भएको, बताउदै नेकपाले मुख्यमन्त्रीलाई राजीनामा दिन सुझाव दिएको हो । साविकको माओवादी केन्द्र, एकीकृत समाजवादी र नागरिक उन्मुक्ति पार्टीको मिलन पछि प्रदेश सभामा ठूलो दल बनेको नेकपाले बुधबार पत्रकार सम्मेलन गर्दै मुख्य मन्त्री शाहले राजीनामा दिनु पर्ने बताएको हो ।
दलका नेता खगराज भट्टले सरकारको दोस्रो कार्यकालको आधा अवधि भन्दा बढी समय समाप्त हुँदै गर्दा प्रदेश सरकार अस्थिरता, निष्क्रियता र दिशाहीनताको खाडलमा फसेको बताए । सरकारबाट अपेक्षित कामहरू कछुवा गतिमा मात्र होइन, कतिपय अवस्थामा पूर्ण रूपमा ठप्प देखिएको बताउदै भट्टले प्रदेश सरकार चिर निन्द्रामा रहेको बताए । विकास खर्चले गति लिन नसकेको बताउदै उनले जनताले सरकारको उपस्थिति अनुभूति गर्न नपाएको बताए । वर्तमान नेतृत्वले सरकार चलाइरहनु भनेको प्रदेशलाई अझै पछि धकेल्नु सरह भएको उनले बताए ।
प्राकृतिक विपत्ति, दुर्घटना वा संकटका बेला सरकारले विज्ञप्ति जारी गर्ने र राहतको नाममा केही रकम घोषणा गर्ने बाहेक कुनै ठोस काम गर्न नसकेको उनले बताएका छन । बैतडी बस दुर्घटनाको छानबिन सम्म गर्न नसक्ने सरकारबाट वर्षौं देखि भूकम्प, बाढी, आरक्ष र पहिरो पीडितहरूको पुनस्र्थापना हुने अपेक्षा गर्नु भनेको दिवास्वप्न देख्नु जस्तै भएको उनले बताए । कानुन निर्माण, योजना कार्यान्वयन, प्रशासनिक सुधार र सुशासनका सवालमा पनि सरकार पूर्णतः असफल देखिएको उनले बताए ।
कार्यालय देखि मन्त्रालय सम्म व्यापक बेथिति मौलाएको, अस्पतालहरूमा नियुक्ति ढिलाइ भएको र संगठन तथा व्यवस्थापन सर्वेक्षण ओएनएम गर्न असफल भएको उनले बताए । त्यसैगरी नीति आयोगमा चरम बेथिति मौलाएको, आयोजना नभएको लगानी सम्मेलनको नाममा अपारदर्शी र मनपरी खर्च गरेको, सर्वोच्च अदालतका आदेश कार्यान्वयनमा आलटाल गरेको, अस्थायी कार्यालय खोली मनमौजी खर्च गरेको, ऐन नबनाई गठन आदेशलाई प्राथमिकता दिएको र समग्र रूपमा सुशासन, पारदर्शिता र जवाफदेहिताको अभाव रहेको उनले बताएका छन ।
१२ बुँदे अभियोग प्रति सरकार गम्भीर बन्नुपर्ने उनले बताउका छन । तीन दल मिलेपछि पनि सुदूरपश्चिम प्रदेशमा कांग्रेस नेतृत्वको सरकार भने सुरक्षित रहेको छ । नेकपा २१ सांसद सहित प्रदेशसभामा ठूलो दल बनेको भए पनि एक जना प्रदेशसभा सदस्य निलम्बित छन् । ५३ सदस्यीय प्रदेशसभामा सरकार बनाउन २७ जना सांसदको आवश्यकता पर्छ । कांग्रेससंग १८ सांसद छन् भने ११ सांसद भएको एमाले पनि कांग्रेस नेतृत्वको सरकारमा रहेको छ ।
