माघ २३ धनगढी । कैलालीको अतरिया स्थित महिला तथा बालबालिका सेभ हाउसले यही माघ २६ गते देखि श्रीमद् भागवत महायज्ञ आयोजना गर्ने भएको छ । महिला तथा बालबालिका सेभ हाउसले यही माघ २६ गते देखि श्रीमद् भागवत महायज्ञ आयोजना गर्ने भएको हो ।
महिला तथा बालबालिका सेभ हाउसमा आश्रित अनाथ तथा असहाय बालबालिकाहरूका लागि अक्षय कोष स्थापना गर्ने उद्देश्यले संस्थाको आयोजनामा महायज्ञ आयोजना गरिएको हो । सेभ हाउसमा आश्रित बालबालिकाहरूको पालनपोषणमा बेला–बेला आर्थिक समस्या हुने भएकाले दीर्घकालीन समाधानका लागि आर्थिक स्रोत जुटाउने उद्देश्यले महायज्ञ आयोजना गरिएको महायज्ञ मूल आयोजक समितिका संयोजक पदमराज जोशीले जानकारी गराए ।
त्यसैगरी संस्थाकी अध्यक्ष जानकी मलासीले संस्थाको आफ्नै भवन नहुँदा सेवा सञ्चालनमा कठिनाइ हुँदै आएको बताउदै संस्थाको भवन निर्माणका लागि समेत स्रोत संकलन गर्ने उद्देश्यले महायज्ञ आयोजना गरिएको बताइन् ।
महायज्ञको अवसरमा माघ २६ गते शोभा (कलश) यात्रा निकालिने, माघ २७ गते देखि फागुन ३ गतेसम्म पूजा–पाठ पारायण, महात्म्य, कथा प्रवचन तथा प्रत्येक दिन साँझ सिंगारिक महाआरती आयोजना गरिने उनले जानकारी गराईन ।
कथा प्रवचन सुमि मानव सहितको समूहले गर्नेछ भने मूल पाठ पारायण, यज्ञ, होम तथा पूजा उपवाचक जनार्दन प्रसाद पन्तले सम्पन्न गर्ने उनले जानकारी गराईन । महायज्ञ अवधिभर अन्नदान, मुठीदान, तुलादान, व्रतबन्ध तथा विवाह लगायतका विभिन्न धार्मिक कार्यक्रमहरू समेत सञ्चालन गरिने बताइएको छ ।
हाल महिला तथा बालबालिका सेभ हाउसमा ४० जना भन्दा बढी अनाथ तथा असहाय बालबालिका आश्रित रहेका छन् । संस्थाको आफ्नै भवन नहुँदा हाल पद्मा अस्पतालले उपलब्ध गराएको भवनबाट सेवा सञ्चालन हुँदै आएको अध्यक्ष मलासीले बताईन ।
