माघ २१ कञ्चनपुर । पाठेघरको मुखको क्यान्सर (सर्भाइकल क्यान्सर) रोकथामका लागि कञ्चनपुरमा पाँच हजार ५ सय किशोरीलाई ‘एचपिभी’ खोप लगाईने भएको छ । आगामी माघ २७ गते देखि फागुन १ गतेसम्म ‘एचपिभी’ खोप अभियान सञ्चालन गरी पाँच हजार ५ सय किशोरीलाई लगाईने भएको हो हो ।
स्वास्थ्य कार्यालय कञ्चनपुरले कञ्चनपुरका पाँच हजार ५ सय छात्रा तथा किशोरीलाई खोप लगाईने जानकारी गराएको हो । स्वास्थ्य कार्यालयका कोल्डचेन अधिकृत जनक बहादुर कुवँरले यस वर्षको अभियानमा कक्षा ६ मा पढदै आएका छात्रा र विद्यालय बाहिर रहेका १० वर्ष उमेरका किसोरीलाई खोप लगाउने तयारी गरिएको जानकारी गराए ।
गत वर्षको अभिायनमा खोप लगाउन छुटेका कक्षा ७ देखि १० सम्म अध्ययनरत छात्रा र विद्यालय बाहिर रहेका ११ देखि १४ वर्ष उमेरका किशोरीलाई खोप लगाइने स्वास्थ्य कार्यालयरका कोल्डचेन अधिकृत कुवँरले बताए ।
प्रत्येक विद्यालयमा खोप केन्द्र निर्धारण गरी कार्यक्रम सञ्चालन गर्ने तयारी गरेको बताउदै कुवँरले ‘विद्यालयमा खोप लगाउन छुटेका वा विद्यालय बाहिर रहेका किशोरीका लागि फागुन १ गते नजिकैको स्वास्थ्य संस्थामा खोप लगाउने व्यवस्था मिलाइएको बताए ।
विश्व स्वास्थ्य सङ्गठनको तथ्याङ्क अनुसार पाठेघरको मुखको क्यान्सर महिलामा हुने क्यान्सर मध्ये सबैभन्दा उच्च जोखिमयुक्त मानिन्छ । नेपालमा पनि महिलामा हुने क्यान्सर मध्ये यो पहिलो स्थानमा रहेको र यसको मुख्य कारण ‘ह्युमन प्यापिलोमा भाइरस’ (एचपिभी) रहेको अध्ययनले देखाएका छन् ।
स्वास्थ्य अधिकारीका अनुसार यौन सम्पर्क हुनुपूर्व किशोरी अवस्थामै यो खोप लगाउनु क्यान्सर रोकथामका लागि सबैभन्दा प्रभावकारी उपाय हो । सुरुवाती चरणमा खासै लक्षण नदेखिने यो रोगबाट बच्न खोपका साथै ३० वर्ष पूरा भएका महिलाले नियमित रूपमा पाठेघरको मुखको जाँच (स्क्रिनिङ) गराउनु पर्ने चिकित्सकको सुझाव छ ।
सरकारले यस रोगको भार कम गर्न राष्ट्रिय खोप कार्यक्रम मार्फत देशभरका किशोरीलाई लक्षित गरी खोप अभियान सञ्चालन गर्दै आएको छ ।
