माघ २१ कञ्चनपुर । भ्रष्टाचार विरुद्ध विभिन्न १३ बुँदे मागहरु राख्दै जेनजी समूहका युवा केशवकुमार बोहरालले आमरण अनशन सुरु गरेका छन् । जेनजी समूहका युवा बोहराले मंगलबार दिउँसो देखि स्थानीय तहमा मौलाएको भ्रष्टाचार, बेथिति र कुशासन विरुद्ध आमरण अनशन सुरु गरेका हुन् ।
सूचनाको हक बमोजिम बेलौरी नगरपालिकालाई विभिन्न विषयमा अनुदान, योजना, बजेट र ठेक्का सम्बन्धी सूचना माग गरिए पनि बेवास्ता गरिदा बाध्य भएर आमरण अनशन बस्नुपरेको बोहराले बताएका छन ।
अनसनरत बोहराले शिक्षा क्षेत्रमा बजेट, दिवा खाजा, नियुक्ति र व्यावस्थापनमा भएको भ्रष्टाचार, अनियमित्ता छानबिन गरी पारदर्शी शिक्षा प्रणाली लागू गर्न, नगर अस्पताल तथा स्वास्थ्य चौकीमा औषधी, जनशक्ति र सेवामा भएको बेथिति अन्त्यगरी निःशुल्क गुणस्तरीय स्वास्थ्य सेवा सुनिश्चित गरिनु पर्ने माग राखेका छन् ।
त्यसैगरी, खानेपानी आयोजनामा भएको अनियमित्ता र भ्रष्टाचारको छानबिन गरी नगर भित्रका सबै घरधुरीमा सुरक्षित खानेपानीको व्यवस्था गरिनुपर्ने, कृषकलाई उपलब्ध गराइनु पर्ने अनुदानमा भएको दुरुपयोग रोक्दै वास्तविक किसानलाई मात्रै सेवा उपलब्ध गराइनु पर्ने, खेलकुदका क्षेत्रमा सुधार गरिनु पर्ने, बजारमा हुने कालोबजारी अन्त्यगरी प्रभावकारी बजार अनुगमन सञ्चालन गरिनु पर्ने माग उनले राखेका छन् ।
यसका साथै १८ वर्ष मुनिका बालबालिकालाई सुर्तीजन्य पदार्थ तथा मदिरा बिक्री गर्न रोक लगाइनु पर्ने, सूचनाको हकको हनन् गर्ने पदाधिकारी तथा कर्मचारीलाई कारबाही गरिनु पर्ने,बेलौरी नगरपालिकामा अवैध तरिकारले नियुक्ति गरिएका अस्थायी कर्मचारीको नियुक्ति बदर गरिनु पर्ने, अलपत्र परेका सडक यथा शिघ्र मर्मत गरिनु पर्ने, ढल निकासको दीर्घकालीन व्यवस्थापन गर्नु पर्ने, युवालाई रोजगारी, उद्यमशील र आत्मनिर्भर बनाउने कार्यक्रम सञ्चालन गरिनु पर्ने लगायतका मागहरू राख्दै जेनजी समूहका युवा बोहरा दुई दिन देखि बेलौरी बजारस्थित भीमदत्त चोकमा अनशन बसेका हुन ।
माग सम्बोधन नभए सम्म शान्तिपूर्ण रूपमा अनिश्चितकालिन अनशनमा बस्न उनले चेतावनी दिएका छन् ।
