माघ १९ कञ्चनपुर । बेल्डाँडी गाउँपालिकाले छोरी जन्माउने आमालाई प्रोत्साहन स्वरुप तीन हजार भत्ता दिने भएको छ । गाउँपालिकाले लैङ्गिक विभेद हटाउने उद्देश्यले छोरी जन्माउने आमालाई तीन हजार प्रोत्साहन भत्ता दिने भएको हो ।
गाउँपालिकाकी उपाध्यक्ष शान्ती नाथले पछिल्लो समय लिङ्ग पहिचान गरी गर्भपतन गर्ने प्रवृत्ति बढेकाले त्यसलाई रोक्न छोरी जन्माउने आमालाई प्रोत्साहन भत्ताको व्यवस्था गरिएको बताइन् ।
’आर्थिक वर्ष २०७९÷८० बाट ‘उपाध्यक्ष कोसेली’ कार्यक्रम अन्तर्गत छोरी जन्माउने आमालाई प्रोत्साहन भत्ताको व्यवस्था गरिएकोे उपाध्यक्ष नाथले जानकारी गराईन । हालसम्म ३ सय ५३ जना आमाले छोरी जन्माए वाफत प्रोत्साहन भत्ता पाएको उनले जानकारी गराईन ।
चालु आर्थिक वर्षमा ४० जना आमालाई छोरी जन्माए वाफत प्रतिव्यक्ति तीन हजारका दरले प्रोत्साहन भत्ता वितरण गरिएको उनले बताईन । प्रोत्साहन भत्ता लिन आउँदा विवाह दर्ता र बालिकाको जन्मदर्ता ल्याउनु पर्ने भएकाले यसले बालविवाहलाई रोक्ने अपेक्षा गरिएको उनले बताईन ।
त्यसअघि पालिकाले सुत्केरी आमालाई पोषण भत्ता स्वरुप ५ सय दिँदै आएको जानकारी गराउदै उनले उपाध्यक्ष कोसेली’ कार्यक्रमबाट पालिकामा गर्भपतिलाई एम्बुलेन्स सेवा निःशुल्क गरिएको बताईन ।
जिल्ला सदरमुकाम वा बाहिर रेफर हुँदा एम्बुलेन्समा ५० प्रतिशत छुटको व्यवस्था गरिएको उनले बताईन । उपाध्यक्ष नाथले छुटको व्यवस्थाले नागरिकलाई राहत भएको महसुस गरेको बताईन ।
३५ वर्ष नाघेका अविवाहित महिलालाई एकल महिला सरह मासिक दुई हजार ५ सय भत्ता दिने गरेको उनले बताइन् ।
’पालिका भित्र रहेका तेस्रो लिङ्गीलाई मासिक भत्ता दिने व्यवस्था गरिएको जानकारी गराउदै उनले टुहुरा बालबालिकालाई पोशाक भत्ता दिने कार्यविधि बनाएर कार्यान्वयनको चरणमा रहेको उनले बताईन ।
