माघ १८ डडेल्धुरा । जिल्ला निर्वाचन कार्यालय डोटीको स्कारपियो गाडी डडेल्धुरामा दुर्घटना हुँदा पाँच जना घाइते भएका छन् ।
शनिवार डडेल्धुराको अमरगढी नगरपालिका वडा नम्बर–११ रडुवा खोला नजिक केआईसिंह राजमार्गमा डडेल्धुराबाट दिपायलतर्फ जाँदै गरेको स्कारपियो अनियन्त्रित भई सडक छेउमा ठोक्किँदा भएको दुर्घटनामा पाँच जना घाइते भएका हुन ।
जिल्ला प्रहरी कार्यालय डडेल्धुराका अनुसार दुर्घटनामा डोटीका निर्वाचन अधिकृत तथा अजयमेरु गाउँपालिका वडा नम्बर–६ का ४२ वर्षीय करुणाकर पन्त, बर्दिया घर भई सशस्त्र प्रहरी बल ३६ नं. गण डोटीमा कार्यरत ४० वर्षीय सुमन चौधरी, तनहुँ भानु नगरपालिका घर भई नेपाली सेना भैरवनाथ गण डोटीमा कार्यरत ३८ वर्षीय सूर्यबहादुर कोइराला, गन्यापधुरा गाउँपालिका वडा नम्बर–३ का ३० वर्षीय मिनबहादुर बोहरा र दिपायल सिलगढी नगरपालिका वडा नम्बर–५ का ४५ वर्षीय चालक तेजबहादुर अधिकारी घाइते भएका छन् ।
प्रहरीका अनुसार घाइते सबैको अवस्था सामान्य रहेको छ । दुर्घटनाको कारणबारे थप अनुसन्धान भइरहेको प्रहरीले जानकारी गराएको छ ।
