माघ ११ धनगढी । सत्तारूढ दलबीच सहमति जुट्न नसक्दा ‘सुदूरपश्चिम प्रदेश स्थानीय सेवाको गठन तथा सञ्चालन पहिलो संशोधन विधेयक २०८२’माथिको काम रोकिएको छ । ऐनका कतिपय दफा विवादित बनेपछि संशोधन गर्न बनेको विधेयक प्रदेशसभामा ‘टेबुल’ भएको लामो समय भइसकेको भए पनि सत्तारूढ दलबीच सहमति जुट्न नसक्दा रोकिएको हो ।
विधेयकमा सहमति जुट्न नसकेकै कारण प्रदेशसभाको चालु अधिवेशन अन्तर्गतको नियमित बैठक पनि अर्को सूचना जारी नभए सम्म स्थगित गरिएको छ । सभामुख भीमबहादुर भण्डारीले स्वार्थी समूह हाबी हुँदा संशोधन विधेयकको थप कारबाही अघि बढ्न नसकेको बताए ।
ऐन कार्यान्वयनबाट सीमित कर्मचारीलाई मात्र फाइदा पुगेको भन्दै असन्तुष्ट कर्मचारीले अदालतमा मुद्दा दर्ता गरेपछि ऐन विवादित बन्न पुगेको हो । अदालतले अन्तरिम आदेश जारी गरी हाललाई ऐन कार्यान्वयन नगर्न र नगराउन आदेश जारी गरिसकेको प्रदेशसभा सचिवालयले जनाएको छ ।
सचिवालयको विधायन शाखाका प्रमुख भूरीप्रकाश जोशीले गहन अध्ययन नगरी लाफरबाही ढंगले कानुन बनाउँदा विवादित बन्न पुगेको बताए । ऐनको दफा ९ मा ज्येष्ठ कर्मचारीलाई कनिष्ट र कनिष्ट कर्मचारीलाई ज्येष्ठ बनाउने खालको प्रावधान समेटिएकाले विवादित देखिएको उनले बताए ।
बढुवा हुन पाउने ज्येष्ठ कर्मचारीको बढुवा नहुँदा उनीहरू अदालत सम्म पुगेका हुन । ऐनबमोजिम यसअघि नै सुदूरपश्चिम प्रदेशका विभिन्न सेवामा कार्यरत धेरै कर्मचारीको बढुवा भइसकेको छ । ऐन बनेर कार्यान्वयमा गएको एक वर्ष नपुग्दै सरकारले यो ऐन संशोधनका लागि पहल गरेको हो ।
ऐन संशोधन विधेकलाई संघीय कानुन अनुसार बनाउन लागिएको भए पनि तत्कालै थप कारबाही अघि बढाउन अन्योल भएको विधायन शाखा प्रमुख जोशीले बताए । सुदूरपश्चिम प्रदेशमा नेपाली काँग्रेस र नेकपा एमालेको गठबन्धन सरकार रहेको छ ।
