माघ ०३ बाजुरा । बाजुराको बुढीनन्दा नगरपालिकाको दानसाँगु खोलामा बेलिब्रिज पुल निर्माणको काम सुरु भएको छ । मार्तडी–कोल्टी सडक खण्ड कोल्टीसम्म पुगेको करिब २० वर्ष पछि दानसाँगु खोलामा पुल निर्माण सुरु भएको हो । लामो समय सम्म पुल नहुँदा वर्षायाममा कोल्टीतर्फ जाने सवारी साधनको आवागमनमा समस्या हुने गरेको थियो ।
सडक डिभिजन कार्यालय अछामका अनुसार हाल दानसाँगु खोलामा सुरु गरिएको निर्माण कार्य तीव्र गतिमा भइरहेको छ । पुल निर्माण सुरु भएपछि स्थानीयवासी खुसी भएका छन । पुल नहुँदा जोखिम मोलेर खोला तर्नुपर्ने बाध्यता हट्ने स्थानीयले अपेक्षा गरेका छन् ।
हिउँदको समयमा पनि दानसाँगु खोलामा पुल नहुँदा मार्तडी–कोल्टी जाने सवारी साधन रोकिँदै आएको सवारी चालक रामबहादुर कार्कीले बताए । मार्तडी–कोल्टी सडकमा सबैभन्दा बढी समस्या बाउली र दानसाँगु खोलामा देखिएको उनले बताए । बाउली खोलामा निर्माण सुरु भएको लामो समय बितिसक्दा पनि अझै पूर्ण रूपमा काम सम्पन्न हुन नसकेको उनले बताए ।
बाउली र दानसाँगु खोलामा निर्माणाधीन पुल समयमै सम्पन्न भए वर्षायाममा पनि मार्तडी–कोल्टी सडक नियमित सञ्चालनमा आउन सक्ने कार्कीले बताए । यसअघि जगाडङ्गा खोलामा रहेको बेलिब्रिज दानसाँगुमा स्थानान्तरण गर्ने प्रयास विवादका कारण सम्भव नभएको उनले बताए ।
विवाद समाधान भएपछि उक्त बेलिब्रिज दानसाँगु खोलामा ल्याएर निर्माण कार्य अघि बढाइएको बुढीनन्दा नगरपालिकाका उपप्रमुख रामबहादुर बोहराले जानकारी गराए । जगाडङ्गा खोलामा रहेको बेलिब्रिज दानसाँगुमा राख्न डिडिएर जनकल्याण जेभीसँग २ करोड २० लाख रुपैयाँमा सम्झौता गरिएको उनले बताए ।
मङ्सिरको पहिलो सातामा पुलको औपचारिक उद्घाटन गरिएको बताउदै उनले सम्झौता अनुसार तीन महिना भित्र पुल निर्माण सम्पन्न गर्ने लक्ष्य राखिएको बताए । हाल काम तीव्र रूपमा भइरहेको र अबको एक महिना भित्र बेलिब्रिज निर्माण सम्पन्न भई सवारी साधन सञ्चालनमा आउने उपप्रमुख बोहराले बताए ।
दानसाँगु खोलामा स्थायी पक्की पुल निर्माणको प्रक्रिया पनि अघि बढाइएको उनलदे बताए । त्यतिन्जेल वर्षायाममा सवारी आवागमन सहज बनाउन बडिमालिका नगरपालिकाको जगाडङ्गा खोलामा रहेको बेलिब्रिज दानसाँगुमा स्थानान्तरण गरिएको उनले बताए । सडक डिभिजन कार्यालय अछामका इन्जिनियर सुभाष साहले ठेकेदार कम्पनीले दुई महिना अघि काम सुरु गरेको बताउदै आगामी एक महिना भित्र निर्माण सम्पन्न हुने बताए ।
