पौष २८ कञ्चनपुर । कञ्चनपुरको शुक्लाफाँटा नगरपालिका वडा नम्बर ४ स्थित कालिका माध्यमिक विद्यालयको खेलमैदानमा जनसहयोग सङ्कलन गरी क्रिकेट पूर्वाधार निर्माण सुरु गरिएको छ । कृष्णसार फाउन्डेसनको नेतृत्वमा आर्थिक सहयोग सङ्कलन गरी क्रिकेट मैदान तथा पिच निर्माण कार्य सुरु गरिएको हो ।
राज्यका तर्फबाट खेलकुद पूर्वाधारमा पर्याप्त लगानी नभए पछि स्थानीय स्तरमा सहयोग जुटाएर र नगरपालिकाको स्रोतसाधन प्रयोग गरी मैदान सम्याउने तथा पिच निर्माण गर्ने कार्य भइरहेको फाउन्डेसनका अध्यक्ष विवेक रावलले जानकारी दिए । “खेलाडीहरू फुटेको पिच र च्यातिएको जालीमा प्रशिक्षण गर्न बाध्य भएको बताउदै अध्यक्ष रावलले उनीहरूको समस्यालाई मूल्याङ्कन गर्दै टर्फ र सिमेन्ट गरी दुवै प्रकारका पिच निर्माण गरिरहेको बताए ।
हाल मैदान सम्याउने र पिच निर्माणको कार्य अन्तिम चरणमा पुगेको बताउदै उनले उक्त मैदानमा हाल महिला र पुरुष गरी क्रिकेटका ४० जना खेलाडीहरुले नियमित प्रशिक्षण गर्दै आएको बताए । प्रशिक्षणमा रहेका राष्ट्रिय तथा अन्तरराष्ट्रिय प्रतियोगिता खेलिसकेका आशिष लुहार, सुशील रावल, कैलाश ऐर, सुरज तिरुवा, सुवेश रावल, आशिका महरा, रविना धामी र मनिषा खत्री लगायतका खेलाडीहरू आफैँ श्रमदानमा खटिएको प्रशिक्षक साजन गौतमले बताए ।
“खेलाडीहरूले पिचमा ढुङ्गा मिलाउने, बोक्ने, माटो बोक्ने सम्याउने लगायतको कार्यमा सहयोग गरिरहेको उनले बताए । क्रिकेट पूर्वाधार निर्माणका लागि अझै आर्थिक अभाव भएकाले सहयोगी हातहरूको खाँचो रहेको उनले बताए । त्यसैगरी निर्माणाधीन क्रिकेट मैदान र पिचको सुदूरपश्चिम क्रिकेट सङ्घका अध्यक्ष वासुदेव जोशी र नेपाल क्रिकेट टोलीका छनौटकर्ता सेलेक्टर युनिल श्रेष्ठ लगायतका टोलीले अनुगमन गरेका छन् ।
अनुगमनका क्रममा सेलेक्टर श्रेष्ठले खेलाडीहरू आफैँ खटिएर ‘टर्फ पिच’ निर्माणमा लाग्नु उदाहरणीय कार्य भएको बताए । सुदूरपश्चिम क्रिकेट सङ्घका अध्यक्ष जोशीले खेलाडीहरूले राष्ट्रिय टोलीमा पुगेर राम्रो प्रदर्शन गरिरहेको बताउदै पूर्वाधार निर्माण भएपछि थप प्रतिभाशाली खेलाडी उत्पादनमा सहयोग पुग्ने बताए ।
