तेज सार्की,पौष २४ कञ्चनपुर । कञ्चनपुरको लालझाडी गाउँपालिकाको १९ औँ गाउँसभा अधिवेशन सम्पन्न भएको छ । विहीबार गाउँपालिकाको सभाहलमा लालझाडी गाउँपालिकाको १९ औँ गाउँसभा अधिवेशन सम्पन्न भएको हो ।
गाउँपालिकाका अध्यक्ष निर्मल रानाको अध्यक्षतामा सम्पन्न अधिवेशनमा गाउँपालिकाका उपाध्यक्ष, वडा अध्यक्षहरू, कार्यपालिका सदस्यहरू, कर्मचारी तथा सरोकारवालाहरूको सहभागिता रहेको थियो।
अधिवेशनमा चालु आर्थिक वर्षका कार्यक्रमहरूको समीक्षा गर्नुका साथै आगामी योजना तथा कार्यक्रमबारे विस्तृत छलफल गरिएको थियो । गाउँपालिकाको समग्र विकास, सेवा प्रवाहको प्रभावकारिता, शिक्षा, स्वास्थ्य, कृषि, पूर्वाधार तथा सामाजिक विकासका विषयहरूमा विशेष ध्यान दिइएको अध्यक्ष रानाले बताए ।
कार्यक्रममा वक्ताहरूले स्थानीय तहलाई थप प्रभावकारी बनाउँदै जनतामुखी सेवा प्रवाहलाई प्राथमिकतामा राख्नुपर्नेमा जोड दिएका थिए । उनीहरुले पारदर्शिता, जवाफदेहिता र सहभागितामूलक विकासलाई निरन्तरता दिने प्रतिबद्धता व्यक्त गरेका थिए । गाउँसभाबाट प्रस्तुत प्रस्तावहरू माथि छलफल गरी आवश्यक निर्णयहरू समेत गरिएको गाउँपालिकाका अध्यक्ष रानाले जानकारी गराए ।
