पौष २२ बझाङ । सिँचाइ आयोजनामा नक्कली कागजात तयार पारेर सरकारी रकम दुरुपयोग गरेको ठहर गर्दै विशेष अदालत काठमाडौँले बझाङको खप्तडछान्ना गाउँपालिकाका तत्कालीन अध्यक्ष वर्कबहादुर रोकाया सहित ६ जनालाई कैद र जरिवाना सजाय सुनाएको छ ।
सिँचाइ कुलो निर्माण कार्यमा भ्रष्टाचार गरेको अभियोगमा उनीहरूविरुद्ध मुद्दा दायर भएकोमा विशेष अदालत काठमाडौँले दोषी ठहर गर्दे कैद र जरिवाना सजाय सुनाएको हो । विशेष अदालतका न्यायाधीश तेजनारायण सिंह र रामबहादुर थापाबीच फैसला गर्ने विषयमा राय बाझिएको थियो ।
राय नमिले पछि मुद्दा आइतबार तेस्रो न्यायाधीश डिल्लीरत्न श्रेष्ठको इजलासमा पेश गरिएको थियो । सिंहले प्रतिवादीहरू दोषी हुने ठहर गरेको रायमा श्रेष्ठले समर्थन जनाए पछि बहुमतका आधारमा फैसला भएको अदालत स्रोतले जनाएको छ ।
अदालतले खप्तडछान्ना गाउँपालिकाका तत्कालीन अध्यक्ष वर्कबहादुर रोकाया, वडा नम्बर ४ का तत्कालीन वडाध्यक्ष भिमबहादुर रोकाया, तत्कालीन प्रमुख प्रशासकीय अधिकृत दीपककुमार रावल, इन्जिनियर सुरेन्द्रबहादुर खाती, असिस्टेन्ट सब–इन्जिनियर जनक थापा मगर तथा उपभोक्ता समितिका अध्यक्ष शमशेर रोकायालाई दोषी ठहर गरेको हो ।
विशेष अदालतले सबै दोषी ठहरिएकालाई ६ महिना कैद र जनही २५ हजार रुपैयाँ जरिवानाको सजाय सुनाएको हो । उनीहरूविरुद्ध आर्थिक वर्ष २०७६÷७७ मा गाउँपालिकाबाट वडा नम्बर ४ स्थित सिम्लका घट्ट सिँचाइ कुलो निर्माणका लागि १४ लाख ८ हजार रुपैयाँ बजेट विनियोजन भएकोमा कामै नगरी २०७७÷७८ मा भुक्तानी लिएको उजुरीका आधारमा अख्तियारले अनुसन्धान गर्दा काम नभएको र घट्ट सिँचाइ योजना नरहेको पाइए पछि आयोगले जनही १४ लाख ८ हजार रुपैयाँ बिगो माग दाबी गरेर मुद्दा दायर गरेको थियो ।
