मंसिर २५ डडेल्धुरा । डडेलधुराको भातकाँडा–बडाल–रेल सडक निर्माणमा गुणस्तरहीन सामग्री प्रयोग गरिएको पाइएको छ । भातकाँडा–बडाल–रेल सडक निर्माणमा बालुवाको सट्टा माटो र कमसल गिट्टी प्रयोग गरी पर्खाल निर्माण गरिएको पाइएको    हो । सडक निर्माणमा माटो र कमसल गिट्टी प्रयोग गरीएको पाईए पछि स्थानीयले आपत्ति जनाएका छन् ।

गन्यापधुरा गाउँपालिका वडा नम्बर–१ रुवाखोला हुँदै डोटीको शिखर नगरपालिकासँग जोडिने मुख्य सडक समयमै निर्माण हुन नसक्दा समस्या भएको स्थानीयले बताएका छन । स्थानीय सुरेन्द्र चन्दले मङ्गलबार माटो प्रयोग गरेर बनाइएको पर्खाल स्थानीयको विरोध पछि भत्काइएको जानकारी गराए ।

कमसल सामाग्री प्रयोग भएको गुनासो बढेपछि प्रमुख जिल्ला अधिकारी विष्णुप्रसाद कोइराला सहितको टोलीले निर्माण स्थलमै पुगेर अनुगमन गरेको उनले बताए । अनुगमन पछि प्रमुख जिल्ला अधिकारी कोइरालाले अत्याधिक लो–बिडिङ, गुणस्तरहीन सामग्रीको प्रयोग गरिनुकासाथै, समयमै काम नगर्ने प्रवृत्ति र गैरजिम्मेवारीपनका कारण निर्माण कार्य प्रभावित भएको बताए ।

साढे चार किलोमिटर सडक कालोपत्रे गर्न आर्थिक वर्ष २०७८÷७९ मा ठेक्का सम्झौता भए पनि हालसम्म काम सम्पन्न हुन नसकेको उनले बताए । त्यो भन्दा पछि ठेक्का लागेका अन्य सडक खण्डहरू गत वर्षमै कालोपत्रे भइसकेको स्थानीयले बताएका छन् ।

२०५२ सालमै ट्र्याक खोलिएको सडक अझै कालोपत्रे नहुदा स्थानीयले निरन्तर आवाज उठाउदै आएको स्थानीय चन्दले     बताए । महाकाली राजमार्गको भातकाँडा बजार देखि साढे चार किलोमिटर खण्ड कालोपत्रे गर्न अनक जोशी मालिका निर्माण कम्पनीसँग साढे नौ करोड बराबरको ठेक्का सम्झौता गरिएकोमा पर्खाल निर्माणका क्रममा खनिएको माटो बालुवाका नाममा प्रयोग गरिएको र ढुङ्गा कुटेर कमसल गिट्टी प्रयोग गरिएको पाइएको उनले बताए ।

स्थानीय सन्तोष देउवाले निर्माण स्थलमा बालुवाको नाममा माटो हालिएको बताउदै गिट्टी पनि गुणस्तरहिन प्रयोग गरिएको बताउदै केही स्थानमा एक्सपायर सिमेन्टको प्रयोग भएको आशंका भएको बताए । पाँच वर्षदेखि काम हुन नसकेको सडक निर्माणमा अझै गुणस्तरहिन सामाग्री प्रयोग हुनु चिन्ताजनक विषय भएको उनले बताए । सडक डिभिजन कार्यालयका कर्मचारीसँग सम्पर्क गर्न खोज्दा प्रतिक्रिया नआएको पनि उनले गुनासो गरेका छन ।

सडक डिभिजन कार्यालय डोटीका सबइन्जिनियर विवेक शर्माका अनुसार हालसम्म ४१ प्रतिशत भौतिक प्रगती भएको छ । भातकाँडा–बडाल–रेल सडक कालोपत्रेका लागि २०७८ माघमा ठेक्का सम्झौता भएको जानकारी गराउदै सबइन्जिनियर शर्माले २०८० चैत मसान्त सम्म काम सक्ने लक्ष्य राखिएको भए पनि उक्त अवधि भित्र काम सुरु नभए पछि म्याद थपिएको जानकारी गराए ।

गत वर्ष कटिङ र पर्खाल निर्माण मात्रै गरिएको बताउदै उनले जसका आधारमा २०८२ असार मसान्त सम्म म्याद पुनः थपिएको बताए । अहिले पर्खाल निर्माणको काम भइरहेको सबइन्जिनियर शर्माले जानकारी गराए । निर्माण कम्पनी अनक जोशी मालिकाका सञ्चालक रघुवीर साउदका अनुसार गत वर्ष केही काम सम्पन्न भएपछि म्याद थपिएको हो ।